ଖୁସି

କର୍ମ ମୟ ଜୀବନର ବ୍ୟସ୍ତତା ଭିତରେ

ପାଇ ଯାଇଛି ସେ ଫାଶୀ ।

ବଡ଼ ହେବାର ଅଦ୍ଭୁତ ନିଶାରେ ଆଜି

ହଜି ଯାଇଛି ସେ ଖୁସି ।।

ଖୋଜୁ ଥିଲି ଖୁସି ମାଆକୁ ଛାଡ଼ି ମୁଁ

ସେ ଡନଲଫ୍ ଗଦିରେ ।

ଜାଣିବାକୁ ପାଇଲି ଛାଡ଼ି ମୁଁ ଆସିଛି

ତାକୁ ମୋ ମାଆ କୋଳରେ ।।

ଖୋଜୁଛି ଖୁସିକୁ ଆଜି ପରା ମୁହିଁ

ଏ ଦୁନିଆର ଭିଡ଼ରେ ।

ହେଲେ ଅସଲରେ ଖୁସିତ ଥିଲା ସେ

ବାପାଙ୍କ ନାଲି ଆଖିରେ ।।

ଖୋଜୁଛି ସେ ଖୁସିକୁ ଆଜିଯେ ମୁଁହିଁ

ଏହି ଟଙ୍କାର ବିଡାରେ ।

ଅସଲ ଖୁସି ତ ଥିଲା ପିଲାଦିନର

ସେ ସାଥିଙ୍କ ମେଳରେ ।।

ମାନ ସମ୍ମାନ କି ଟଙ୍କା ପଇସା ରେ କେବେ 

ମିଳି ନଥାଏ ଯେ ଖୁସି ।

ଲୋଭ, ଗର୍ବ, ଅହଙ୍କାର ଇର୍ଷା ର ନିଆଁ ରେ

ପାଇଯାଏ ସିଏ ଫାଶୀ ।।

ସ୍ନେହ ଶ୍ରଦ୍ଧା ର ପବିତ୍ର ବନ୍ଧନରେ 

ସିଏ ଲୁଚି ରହି ଥାଏ ।

ମମତା ଫାଶରେ ପ୍ରୀତି ର ଗଣ୍ଠିରେ

ପରା ଖୁସି ମିଳି ଥାଏ ।।