କେମିତି ?
କେମିତି ?
କେମିତି କେଜାଣି ଧିରେଧିରେ
ସଫା ପୋଷାକ ଗୁଡ଼ାକ ମଳି ହୋଇଯାଏ ,
ପରିଷ୍କାର ଘରଟାରେ ଧୂଳି ଜମିଯାଏ ?
ପୂର୍ଣ୍ଣମୀରୁ ଅମାବାସ୍ୟା ପୁଣି ପୂର୍ଣ୍ଣିମୀ ,
ତୁମ ପ୍ରତି ପ୍ରୀତି ଅପ୍ରୀତି
ପୁଣି ଅଲକ୍ଷ୍ୟରେ ଅଚାନକ କେଉଁଠୁ
ସମସ୍ୟାର ବିଶାଳ ଜୁଆର ଉଜୁଡ଼ିପଡ଼ି
ଅକାଲୁଆ ଅଣନିଃଶ୍ବାସୀ କରିଦିଏ ।
କେମିତି ସବୁ ବଢ଼ିବଢ଼ି ବୁଢ଼ାହୋଇ
ଶେଷରେ ମାଟିରେ ମିଶିଯାଆନ୍ତି ?
କେମିତି ଚିନ୍ତାର ଅସଂଖ୍ୟ ଗହଳି
ମନକୁ ମାଡ଼ିବସେ
ପୁଣି କେମିତି ଅଚାନକ ସବୁ
ନୀରବ ନିଶ୍ଚଳ ହୋଇଯାଏ ?
ସବୁ କାହିଁକି ଅହରହ ବୁଲେ ?
ପୁଣି ଏତେ ଧିରେଧିରେ ଯେ ଜାଣିହୁଏନି ,
ନିଦ ଭାଙ୍ଗିଲା ବେଳକୁ
ସବୁ କିଛି ସରି ଯାଇଥାଏ ,
ବୋହିଯାଇଥାଏ ନହେଲେ
ବାଷ୍ପହୋଇ ଉଡ଼ିଯାଇଥାଏ ।
ଚିରନ୍ତନ କ'ଣ ଏଇ ଏକା
ଗୋଲଗୋଲ ଧିରେଧିରେ ବୁଲିବା ?
ଆଉ ତୁମକୁ ଅପେକ୍ଷାଟା
ଜୀବନକୁ ନା ମରଣକୁ ?