କାଚ କେନ୍ଦୁ ଆଖିରେ ଚାହିଁଲେ ରହସ୍ୟ

ଚିନ୍ତା ଶୂନ୍ୟ ସ୍ଥିର କାଚ କେନ୍ଦୁ ଆଖିରେ ତୋତେ ଚାହିଁଲେ

ତୋ ମୋ ମଧ୍ୟରେ ବ୍ୟବଧାନ କ୍ଷଣକେ ମିଳାଇ ଯାଏ 

' ମୁଁ ' ଆଉ ' ମୋର ' କୁ ନେଇ ଜମାଇଥିବା 

ଏ କୋଳାହଳ ପୂର୍ଣ୍ଣ ହାଟ ବେପାର ନ ଭାଙ୍ଗିବା ଯାଏଁ 

ତୋ ପାଖକୁ ଫେରି ତୋର ହେବାଟା ଅସମ୍ଭବ 

ମୋର ଏ ହାଟ ବେପାର ଏ କୋଳାହଳ କାହା ପାଇଁ ?

କାହିଁକି ତୋଠୁ ଅଲଗା ହୋଇ ଅଲଗା ହେଲି ମୁଁ ?

ଏ ' ମୁଁ ' ସୃଷ୍ଟି ହେବାର ରହସ୍ୟ କ'ଣ ମୁଁ ଖୋଲି ପାରିବି ?

ଏ ତ ' ମୁଁ ' ର ଚାଲାଖି କିଣାବିକା ମୋଲଚାଲ୍ ବେପାର 

' ମୁଁ ' ଚାହେଁ ତୋ ଠୁ ଅଲଗା ହୋଇ 

ଗଢ଼ିବ ଆପଣାର ଗୋଟେ ଅଲଗା ସାମ୍ରାଜ୍ୟ 

' ମୁଁ ' ପାଇଁ ତୁ ହିଁ ବଡ଼ ପ୍ରତିବନ୍ଧକ ବଡ଼ ପ୍ରତିଯୋଗୀ

 

ସେ ଚାହେଁ ତା ପାଦେ ତୁ ଆତ୍ମ ସମର୍ପଣ କର 

ହେଲେ ତୁ କିଛି ଚାହୁଁନୁ 

ତୁ ତ କେବେ କିଛି ଚାହିଁନୁ 

ତୁ ଥିଲେ ସିନା ଚାହିଁବୁ 

ଏ ' ମୁଁ ' ହିଁ ତୋତେ ବା 'ତୁ' ର ସୃଷ୍ଟିକର୍ତ୍ତା 

' ତୁ ' ଯେବେ ସତରେ ନାହୁଁ ସର୍ବତ୍ର ଅଛି କେବଳ ' ମୁଁ '

ତେବେ ଏ ' ମୁଁ ' ଥିବା ଯାଏଁ ' ତୁ ' ରହିବୁ 

ଆମେ ଦୁହେଁ କେବେ ବି ଏକ ହୋଇପାରିବାନି 

କାରଣ ଆମେ ଦୁହେଁ ହିଁ ମିଛ କଳ୍ପନା ମନଗଢ଼ା 

ଆମେ କାହାର ମିଛ କାଳ୍ପନିକ ମନଗଢ଼ା କାହାଣୀ ?

'ମୁଁ ' ' ତୁ ' କୁ ନେଇ ଲେଖି ଚାଲିଥିବା କାହାଣୀର

ଲେଖକ କିଏ ? ପ୍ରକୃତି ? ଇଶ୍ଵର ?

ନାଁ କେହି ଲେଖକ ନାହାନ୍ତି 

କି ପ୍ରକୃତି ଇଶ୍ଵର କେହି କୁଆଡ଼େ ନାହାଁନ୍ତି 

ଏ ସବୁ ବି ' ମୁଁ ' ଦ୍ୱାରା ସୃଷ୍ଟ 

ଯେବେ ' ମୁଁ ' ଥାଏ ସଭିଏଁ ଥାଆନ୍ତି 

ଯେବେ ' ମୁଁ ' ନଥାଏ କେହି ନଥାନ୍ତି...