କାନ୍ଦେ ଆଜି ବଡ଼ଦାଣ୍ଡ
କାନ୍ଦେ ଆଜି ବଡ଼ଦାଣ୍ଡ
କାନ୍ଦେ ଆଜି ବଡ଼ଦାଣ୍ଡ
କାନ୍ଦୁଛି ଶରଧା ବାଲି,
ସରିଗଲା ରଥ, ଭକ୍ତ ଭଗବାନ
ନ ହେଲେ ଯେ କୋଳାକୋଳି l
ସେ ଅପୂର୍ବ ଦୃଶ୍ୟ ମହାମିଳନ
ଦେଖି ହୋଇ ଥାନ୍ତେ ଧନ୍ୟ,
ମହାମିଳନର କୁଞ୍ଜ ବଡ଼ଦାଣ୍ଡ
ସାଜି ଥାଏ ଚିର ଦିନ l
ଶରଧା ବାଲିରେ ଭକ୍ତ ପଦ ଧୂଳି
ପାଇ ହୋଇ ଥାଏ ଧନ୍ୟ,
ଶରଧା ବାଲିକୁ ସର୍ବାଙ୍ଗ ରେ ବୋଳି
ଭକ୍ତ ଲଭେ ମହା ପୁଣ୍ୟ l
ଏକା ଏକା ଜଗା ମାଉସୀ ଘରକୁ
ବିରସ ବଦନେ ଗଲା,
କାହିଁ ଥିଲା ଏଇ କୋରନା ରାକ୍ଷସ
ସବୁ ସୁଖ ହରି ନେଲା l
ଦୂର ଦର୍ଶନରେ ନିରେଖି ଦେଖିଲେ
କାଳିଆ ଠାକୁର କହି,
ଘରେ ଘରେ ବସି ମୁଣ୍ଡିଆ ମାରିଲେ
ଆଖିରୁ ଅଶ୍ରୁ ଝରାଇ l
ଦୁଇ ହାତ ଟେକି କଲେ ହରି ବୋଲ
ଶଙ୍ଖ ହୁଳହୁଳି ଦେଇ,
ଜୟ ଜଗନ୍ନାଥ ମହାବାହୁ ରଖ
ରଖ ହେ ଜଗତ ସାଇଁ l
ତୁମେହିଁ ଆତ୍ମା, ପରମାତ୍ମା ତୁମେ
ତୁମେହିଁ ପ୍ରାଣ କରତା,
ତୁମେ ହିଁ ସୃଷ୍ଟି, ବିଲୟ ତୁମେହିଁ
ତୁମେ ହିଁ ଭାଗ୍ୟ ବିଧାତା l
ତୁମେ ହିଁ ଆଶା ଭରସା ତୁମେହିଁ
ତୁମେହିଁ ପ୍ରାଣ ସ୍ପନ୍ଦନ
ତୁମରି ଶରଣେ ଯାଉଛୁ ହେ ପ୍ରଭୁ
ଫେଡ଼ି ଦିଅ ହେ କଷଣ l
ତୁମ ହାତ ଗଢା ଏ ସୁନ୍ଦର ସୃଷ୍ଟି
ଅଦିନେ ଯାଉଛି ଭାସି,
ଆହେ ଚକ୍ରଧର ମିନତୀ ମୋହର
ରକ୍ଷା କର ବାରେ ଆସି l