କାଳିଆ ଆସିଲା ମୋର

ଆସିଲା କାଳିଆ ବଡ଼ ଦେଉଳରୁ

ଭାଇ ଭଉଣୀଙ୍କୁ ଧରି

ହଲି ଝୁଲି କରି ଟାହିଆ ହଲେଇ

ଆସୁଥାଏ ଥିରି ଥିରି ।

ଘଣ୍ଟ ହୁଳହୁଳି ଡାକ ପଡୁଥାଏ

କାଳିଆ କାଳିଆ ବୋଲି

ଦେଖି ତତେ ଆଜି ବହୁଦିନ ପରେ

ମନକୁ ମୋ ଶାନ୍ତି କଲି ।

ଦେଖି କରି ତୋର ରୂପରେ କାଳିଆ

ଆଖି ମୋର କାନ୍ଦୁଥାଏ

କାହିଁରେ କାଳିଆ ଲୁହ ମୋ ଆଖିରୁ

ଆପେ ଆପେ ଝରୁଥାଏ ।

ଯାଇ ସିନା ଆଜି ପାରିଲି ନାହିଁରେ

ଘରେ ବସି ଦେଖୁଅଛି

ମନର କଥାକୁ କାଳିଆରେ ତତେ

ଏଇଠୁ କହି ଦେଉଛି ।

ଭାବର ଠାକୁର ଲୀଳାମୟ ତୁମେ

ଭକତ ଜୀବନ ଧନ

ଭକତଙ୍କ ପାଇଁ ରଥଯାତ୍ରା ତୋର

ଭକତ ଠାରେ ତୋ ମନ ।

ଜାଣି ମୁଁ ପାରୁଛି ମନ କଥା ତୋର

କଷ୍ଟ ତତେ ହେଉଥିବା

ବଡ଼ ଦାଣ୍ଡେ ତୋର ଭକତ ନ ଦେଖି

ଦୁଃଖ ତତେ ଲାଗୁଥିବ ।

ନେଇଯା କାଳିଆ ରୋଗକୁ ଦୁରେଇ

ଯିବୁ ତୋର ବଡ଼ ଦାଣ୍ଡ

ମଣିମା ମଣିମା ଡାକୁଥିବୁ ତତେ

ଲଗେଇ ତଳେରେ ମୁଣ୍ଡ ।