ଜୁଇନିଆଁ

              

ପାଖେ ଅଛି ବୋଲି ବୁଝି ପାରୁନାହଁ

ମୋ ଭଲ ପାଇବା କେତେ ଗଭୀର

ଜୁଇରେ ଜଳିବି ଯାଇ ଯେତେବେଳେ

ଜୁଇନିଆଁ ଦେବ ତାର ଖବର ।

ପାଖେ ଥାଇ ଯେବେ ମନାସୁ ଥିଲି ମୁଁ

ତୁମର ମଙ୍ଗଳ ସୁଖ ସୌଭାଗ୍ୟ

ବୁଝି ପାରିଲନି ହୃଦୟର କଥା

ଜୁଇ ନିଆଁ ମୋର ବୁଝାଇ ଦେବ ।

ମୋର ଶବ ଯେବେ ଡେଇଁ ଚାଲିଯିବ

ତୁମର ଏରୁଣ୍ଡି ଘର ବାରଣ୍ଡା

ଶବ ଚାଲିଯିବ ଘରକୁ ଫେରିବ

(ଘର) ଇଟା ବି କହିବ ମୋହରି କଥା ।

ସକାଳୁ ଉଠିଲେ ମୁଁ ମନେ ପଡିବି

ଶଯ୍ୟାକୁ ଯାଇ ବି ମୋତେ ପାଇବ

ପଶ୍ଚାତାପ କରି କ୍ଷମା ମାଗିବାକୁ

ନିଶ୍ଚୟ ତୁମେ ଯେ ବିକଳ ହେବ ।

ମୋ ଜୁଇ ଜଳିଲେ ସେ ଅଗ୍ନିଶିଖା ବି

ତୁମ ସୁରକ୍ଷାର କଥା ଭାବିବ

ମୋ ପୁଣ୍ୟ ବଳରେ ପ୍ରଭୁଙ୍କ ପାଦରେ

ତୁମରି ମଙ୍ଗଳ ମନାସୁ ଥିବ ।