ଜୀବନକୁ ଭଲ ପାଉଛି
ଜୀବନକୁ ଭଲ ପାଉଛି
ମରଣକୁ ଦେଇ ବରଣ ମାଳ
ମୁଁ ଜୀବନ କୁ ଭଲ ପାଉଛି
ଆୟୁଷ କୁ ଆଜି ପଚାରି ଦେଖେ ମୁଁ
କେତେ ବଞ୍ଚୁଛି ଅବା ମରୁଛି।
ମୁଁ ଜୀବନକୁ ଭଲ ପାଉଛି।।
ସଡକ ସେପଟ ଆବୁଡ଼ା ଖାବୁଡ଼ା
ଏପଟରେ କଣ୍ଟା ବୁଦାକୁ ବୁଦା
ଖସଡ଼ା ବାଟ କୁ ଅଦିନିଆଁ ମେଘ
ପାଦ ଚିପି ଚିପି ଯାଉଛି।
ମୁଁ ଜୀବନକୁ ଭଲ ପାଉଛି।।
ଅନେକ ଦିନର ଉଜୁଡ଼ା ସପନ
ନିଦୁଆ ଆଖିର ପଲକ ତଳୁ
କୁଞ୍ଚା ଚାଦରକୁ ମୁହଁରେ ଘୋଡେଇ
ଶୋଇବାକୁ ଭାବି ଚେଉଁଛି
ମୁଁ ଜୀବନକୁ ଭଲ ପାଉଛି।।
ଥୁଣ୍ଟା ବରଗଛ ଦୁଇ ଖଣ୍ଡ ଶାଖା
ତଥାପି ଖିଙ୍କାରୀ ଖରାକୁ
ଯେତିକି ପାରୁଛି ମରିବା ପରେ ବି
କଙ୍କାଳ ମୋ ଛାଇ ଦେଉଛି
ମୁଁ ଜୀବନକୁ ଭଲ ପାଉଛି।।
ଡହଡହ ନିଆଁ ଲିଭିବା ଆଗରୁ
ପାଣି ଛାଟି ଦେଲେ ଅଙ୍ଗାର
ଅଙ୍ଗେ ଅଙ୍ଗେ ବାକି ଇନ୍ଧନ ସାଇତି
ପାଉଁଶ ଉଡ଼େଇ ଦେଉଛି
ମୁଁ ଜୀବନକୁ ଭଲ ପାଉଛି।।
ସେପଟୁ ମରଣ ଡାକେ ହାତ ଠାରି
ଏପଟୁ ଜୀବନ ଓଟାରି
ଦି ଦିନିଆଁ ଏ ପୀରତି ମହୁଲୀ
ଅଳପ ଅଳପ ପିଉଛି
ମୁଁ ଜୀବନକୁ ଭଲ ପାଉଛି।।