ଜୟ ଶିବ ଶମ୍ଭୁ

ଜୟ ଶିବ ଶମ୍ଭୁ କରୁଣା ସାଗର

ଭବ ଦୁଃଖ ଶୋକ ହାରି

ତୁମେ ଦୟାକଲେ ମୁକ କୁହେ କଥା

ପଙ୍ଗୁ ଲଙ୍ଘିପାରେ ଗିରି I

ଜୟ ଉମାପତି ଅଗତିର ଗତି

ଭୋଳାନାଥ ସଦାଶିବ

ତୁମ ଦୟା ଯାହା ଉପରେ ରହିବ

ତାକୁ କିଏ ଦୁଃଖ ଦେବ ?

ସାରା ଶରୀରରେ ବିଭୁତିକୁ ଲେପି

ଶ୍ମଶାନରେ ବାସ କର

ଡମ୍ବରୁ ବଜାଇ ଉଦଣ୍ଡ ନାଚିଲେ

ବିଶ୍ୱ ହୁଏ ଥରହର I

କଇଳାଶେ ଯେବେ ଧ୍ୟାନମଗ୍ନ ହୁଅ

ପାଖ ମାଡନ୍ତିନି କେହି

କୋପେ ଆଖିଖୋଲି ଚାହିଁଦେଲେ ତୁମେ

ପୃଥ୍ୱୀ ଡାକେ ତ୍ରାହି ତ୍ରାହି I

ତୁମେ ସତ୍ୟ ତୁମେ ସୁନ୍ଦର ହେ ପ୍ରଭୁ

ତୁମେ ଗତି ତୁମେ ମୁକ୍ତି

ତୁମ ଦୟା ଟିକେ ପାଇଯାଏ ଯିଏ

ମିଳିଯାଏ ତାକୁ ଶକ୍ତି I

ଅନାଥର ନାଥ ଆହେ ସୋମନାଥ

ତୁମେ ହରି ତୁମେ ହର

ତପେହେଉ ଅବା କୋପେହେଉ ପ୍ରଭୁ

ମନୋବାଞ୍ଛା ପୂର୍ଣ୍ଣ କର I