Library
Profile
ସିଦ୍ଧି
ସିଦ୍ଧି
ବିଚଳିତ କାହିଁପାଇଁ
ଧୁ ଧୁ ଖରାରେ ଅସ୍ତବ୍ୟସ୍ତ ହେଇସାରିଛୁ
ଏବେ ବର୍ଷାରେ ଭାସି ଯା
ଶୀତ ଆସିବ କଅଁଳିଆ ଉଷ୍ମ ପରସ୍ତତଳେ
ଢାଙ୍କିହେଇ କେବଳ ମୁହଁଟା ବାହାରକୁ ରଖିଥିବୁ
ଦେଖିଛୁତ ! ନିଆଁରେ ତରଳି ଯିବାପରେ
ସୁନା କେମିତି ଚକ୍ ଚକ୍ ଚମକେ ।
ଢଳ ଢଳ ହେଇଥିବା ରୂପାରସ ଛାଞ୍ଚରେ ଢାଳି
ପିଟି ପିଟି ସାବାଡ଼ କଲାପରେ
ମନମୋହିନୀ ରୂପରେ ଆକାର ନିଏ
ବିନା ଥରଥରିଆ କଷ୍ଟରେ
କିଛି ବି ଚମତ୍କାର ଆଶା କରିବୁନି
କ'ଣ ଭାବିଛୁ ଆରାମରେ . . . ଆରାମରେ
ଅକ୍ଳେଶରେ ପାଇଯିବୁ ?
ଯଦି କିଛି ଚାହୁଁ ପରିବର୍ତ୍ତନ ତାହେଲେ ଶୁଣ
କଠିଣ ରୁ କଠିଣ ଅବସ୍ଥା କୁ ସାମ୍ନା କରିବାକୁ ପଡିବ
ତାପରେ, ହେଇପାରେ ଉଦ୍ଗତ ହେବୁ
ତୋ ଇପ୍ସିତ ସ୍ଥିତିରେ ।
ସେଦିନ ତୁ
ଧୋ ଧୋ ବାୟାଗୀତ ଶୁଣୁଥିଲୁ
ଜହ୍ନମାମୁଁକୁ ସାକ୍ଷୀରଖି
କେତେ ଭାତ ଡାଲମା ଚକଟା
ଟକ ଟକ ଗିଳିଦେଉଥଲୁ
ଆଉବି ଗାଈ ପାଇଁ ଗୋଟିଏ ଗୋଲା
ତା'ବାଛୁରୀ ପାଇଁ ଆଉ ଗୋଟିଏ ରଖୁଥିଲୁ ।
ସେ ସ୍ୱାଦ ଆଉ ଆଜିର "ମ୍ୟାଗି" ଭିତରେ
ପ୍ରତିଯୋଗୀତା ହେଲେ କେଜାଣି କିଏ ଜିତିବ ?
ଗାଁ ବଡଦାଣ୍ଡ ରେ ବରବାବୁର ବରାତଗମନ ଭିଡରେ ବାପାଙ୍କ କାନ୍ଧରେ ବସି ଦେଖଣାହାରୀ ଭାବେ
ଆଃ ! କି ଉଲ୍ଲାସ
ଆଉ ବି ନଦୀପାର ହୋଇ
ଆରଗାଁ ସ୍କୁଲକୁ ପଢିବାପାଇଁ ଯିବା ଟା
କ'ଣ କଷ୍ଟ ନ କରିଛୁ ତୁ !
ଆଜ୍ଞାଙ୍କର ତାଗିଦ ଓ ସୁନ୍ଦର ଢଙ୍ଗରେ ପାଠପଢ଼ାର ବି ସୋପାନ ବି ଡେଇଁ ସାରିଛୁ
ଏବେ ତୋ'ର ସମୟ ଆସିଛି
କିଛି କରିକି ଦେଖାଇବାପାଇଁ,
ଆଜିର ତୁ ମିମାଂସାରେ ଘରଲୋକଠୁ ପରଲୋକ
ସଭିଏଁ ନିକିତିରେ ତଉଳିବେ,
ତା'ପରେ,
ମିଶାଣ ଫେଡାଣ ରେ ମନମାଫିକ ମୂଲ୍ୟ ଲଭିବୁ ତ ଠିକ
ନହେଲେ ତୁ ତୋର ହୋଇ ରହିଯିବୁ,
କେହି ଭାଉ ଦେବେନାହିଁ
ଅବଶେଷରେ ଜଣାପଡିଯିବ
ତୁ . . .ଏକ ଜନସାଧାରଣ
ଅଥବା ଏକ ସିଦ୍ଧ, ସାବଲୀଳ ବ୍ୟକ୍ତିବିଶେଷ ।
