ଆହେ ଜଗନ୍ନାଥ ତୁମ୍ଭରି ଯୋଗୁଁ

ଗାଆଁ ସହର ଓ ଦେଶ ବିଦେଶୁ

ଆସନ୍ତି ଶ୍ରଦ୍ଧାଳୁ ଶିରି କ୍ଷେତର,

ଆହେ ଜଗନ୍ନାଥେ ତୁମ୍ଭରି ଯୋଗୁଁ

ହେଲା ଅଞ୍ଚଳର ଭାଗ୍ୟ ଉଦୟ ।

ଆସିବା ଯିବାଙ୍କ ଧାଆଁ ଦଉଡ

ଅଟୋ ହେଉ ଅବା ରିକସା କୁହ,

ଯାନ ବାହନ ଆସ୍ଥାନ ସ୍ଥଳଠୁ 

ରେଳବାଇ ଯାଏଁ ସବୁଠି ଭିଡ ।

ଅବଢ଼ା, ନିର୍ମାଲ୍ୟ, ଟଙ୍କ ତୋରାଣି

ଖଜା, ପେଡା, ମୁଆଁ, ମିଷ୍ଟାନ୍ନ ଆଦି;

ଅନ୍ନ, ଡାଲି, ଖିରି, ପ୍ରସାଦ କିଣି

ଆନନ୍ଦ ବଜାରେ ଭୁଞ୍ଜନ୍ତି ବସି ।

ବଡଦାଣ୍ଡ ଶୋଭା ସନ୍ଧ୍ୟା ସମୟେ

ପର୍ଯ୍ୟଟକ ହୃଦ ବିଭୋର କରେ,

ଦୁଇ ହାତ ଟେକି ଭକତ ଆପେ

ଜୟ ଜଗନ୍ନାଥ ଶଦ୍ଦ ଉଚ୍ଚାରେ ।

ଦୋକାନ ବଜାର ସବୁଜାଗାରେ

ମନୋହାରୀ ବସ୍ତୁ ଆଖି ଲୋଭାଏ,

ପ୍ରଭୁଙ୍କର ଢାଞ୍ଚା କାଠ ଦେହରେ

ନକିଣିବା ଲୋକ କିଣି ପକାଏ ।

ପାଦ ଥାପୁ ଥାପୁ ସମୁଦ୍ର କୂଳେ

ମେଣ୍ଟିଯାଏ ଥକ୍କା ଲୁଣି ପରଷେ,

ଜାକ ଜମକର ବାଲି ପଠାରେ

ନାନା ବିଧ ଖାଦ୍ୟ ମନକୁ ରସେ ।

ସହସ୍ର ଆସନ୍ତି ତୁମ୍ଭରି ପୁରୀ

ଦରଶନ ଅନ୍ତେ ଭ୍ରମଣ ପୁଣି, 

ପର୍ଯଟନ ସ୍ଥଳ ରହିଛି ଘେରି

ବ୍ୟବସାୟ ଏଥୁ ହୁଅଇ ବୃଦ୍ଧି ।

ଧାମ ମଧ୍ୟେ ପୁରୀ ଅଟଇ ଏକ 

ଜନ ସମାଗମ ତେର ପରବ,

ରହିବା ଖାଇବା ବାକି ବ୍ୟବସ୍ଥା

ଷୋହଳ ଅଣାତ ଚାଲେ ବେପାର ।

ନୀତି କାନ୍ତି ଲାଗି ନାନା ଜିନିଷ

ପାଟ ବସ୍ତ୍ର ହେଉ ପହଣ୍ଡି ସାଜ,

ଦୂର ଦୁରାନ୍ତରୁ ହୁଏ ବରାଦ

ମନ୍ଦିର ଅଛି ତ ବଞ୍ଚିଛି ଶିଳ୍ପ ।

ତୁମ ଉପସ୍ଥିତି ପୁରୀରେ ଯେଣୁ

ଡୋରି ଲଗାଉଛ ବଢୁଛି ଶ୍ରୋତ,

ଯେଣୁ ବ୍ୟବସାୟ ବରଷ ଯାକ

ତହିଁରୁ ସମୃଦ୍ଧ ସାରା ଅଞ୍ଚଳ।