ଜୟ ଦଧିବାମନ

ପ୍ରଣିପାତ କରି ପ୍ରଭୁ ତୁମରି ପୟରେ

କିଛିପଦ ଲେଖିବାକୁ ତୁମରି ଇଛାରେ

ଜନମ ମରଣ ପରା ସତ୍ୟ ଜୀବନରେ

ତଥାପି ବୁଝୁନି ନର ପଡ଼ି ମିଛମାୟାରେ

ଦିବ୍ୟ ଜ୍ଞାନ ଦେଉଥାଅ ସଦା ଚକାନୟନ

ଜୟ ଦଧିବାମନ ଜୟ ଦଧିବାମନ..........(୧) 

କାଠଯୋଡ଼ି ତୀରେ ଉରାଳୀ ଗ୍ରାମରେ

ବିରାଜିଛ ତୁମେ ଦଧିବାମନ-ଅବତାରେ

ତୁମପାଇଁ ଲୁହ ଶୁଖି ମୁଖେ ହସ ଭରେ

ସଖାସାଜି ନାଚ ତୁମେ ଭକ୍ତ ଗହଳରେ

ଧର୍ମଦେବତା ହେ କର ଧର୍ମ ସଂସ୍ଥାପନ

ଜୟ ଦଧିବାମନ ଜୟ ଦଧିବାମନ...........(୨)

ପରିବେଶ କମ୍ପେ ଏଠି ଘଣ୍ଟ-ମୃଦଙ୍ଗରେ

ମନ ପୁଲକିତ ଦେଖି ସନ୍ଧ୍ଯା ଆଳତୀରେ

ଆବାଳ ବୃଦ୍ଧ ବନିତା ତୃପ୍ତ ତୁମ ଦର୍ଶନରେ

ମଙ୍ଗଳମୟ ଏ ସଂସାର ତୁମ ଆଶିଷରେ

ପୂରଣ ହେଉ ସର୍ବଜନଙ୍କ ଆଶା ଓ ସପନ

ଜୟ ଦଧିବାମନ ଜୟ ଦଧିବାମନ......... (୩) 

ଭକ୍ତିଭାବ ଖେଳିଯାଉ ସାରା ଜଗତରେ

ପୂଣ୍ୟଧାମ ସାଜୁ ଏ ଅଞ୍ଚଳ ତୁମ ମହିମାରେ

ସନାତନ ସଂସ୍କୃତି ଜୟ ହେଉ ସାରା ବିଶ୍ୱରେ

ସତ୍ଯ-ନିଷ୍ଠା ଜନ୍ମନେଉ ପ୍ରତି ଜନମାନସରେ

ପାପ ନାଶ ହୋଇ ହେଉ ପୂଣ୍ୟ ଉତ୍ଥାପନ

ଜୟ ଦଧିବାମନ ଜୟ ଦଧିବାମନ......... (୪)