ଜୀବନ ଜଞ୍ଜାଳମୟ

ଏକାକୀ ଏଇଠି ବସି ଲେଖୁଅଛି

ତୁମକୁ ମୋ ମନ କଥା,

ଜାଣିବ କେଉଁଠି କେମିତି ରହିଛି

ବୁଝିପାରିବ ମୋ ବ୍ୟଥା ।

ପ୍ରଯୁକ୍ତି ବିଦ୍ୟାର ଅଧ୍ୟୟନ ପରେ

ନିଯୁକ୍ତି ପରୀକ୍ଷା ଦେଇ,

ଆସିଗଲି ଏଇ ବାହାର ରାଜ୍ୟକୁ

କୃତକାର୍ଯ୍ୟ ତହିଁ ହୋଇ ।

କାର୍ଯ୍ୟାଳୟ ମୁଖ୍ୟ କାର୍ଯ୍ୟ ଦେଲେ ଯାହା

ଦକ୍ଷତାର ସହ କଲି,

ଅନ୍ୟ କର୍ମଚାରୀମାନଙ୍କ ସକାଶେ

ଉଦାହରଣ ମୁଁ ହେଲି ।

ଘର ଲୋକ ସଙ୍ଗେ ବାର୍ତ୍ତା ହେଉଥିଲା

ଭ୍ରାମ୍ୟଭାଷ ଯୋଗେ ମୋର,

ଥରଥର କଣ୍ଠେ ଜଣାଇଲ ଦିନେ

ହେବ ତୁମ ବାହାଘର ।

ଆଉ କିଛିଦିନ ଅପେକ୍ଷା ସକାଶେ

ଅନୁରୋଧ ଯେବେ କଲି,

କହିଲ-ତୁମରି ମାଆଙ୍କର ଦେହ

ଅସୁସ୍ଥ ରହୁଛି ଖାଲି ।

ଆଗାମୀ ତିଥିରେ ହେବ ବାହାଘର

କରିପାରିବିନି ମନା,

ଶୁଣି ଚେଷ୍ଟା କଲି, ଛୁଟି ମିଳିଲାନି

ଭାରିକଷ୍ଟ ତୁମବିନା ।

ବଞ୍ଚିବା ଯେମିତି ପିତା ଲାଗୁଥିଲା

ବୁଝେଇଲେ ଜଣେ ସାଥୀ,

ଧୈର୍ଯ୍ୟ ହରାଅନା ଅମୂଲ୍ୟ ଜୀବନ

ଦେଇଛନ୍ତି ବିଶ୍ୱପତି ।

ଦୁଇ ପରିବାର ସମସ୍ୟା ଘେରରେ

ଯିଏ ଯାହା ଲାଗି ଗଢ଼ା,

ସିଏ ହେବ ତା'ର ଜୀବନର ସଙ୍ଗୀ

ନୁହେଁ ଇଏ ମନ ଗଢ଼ା ।

ସମାଜ ମଙ୍ଗଳ କାର୍ଯ୍ୟେ ମଗ୍ନ ରହ

କାର୍ଯ୍ୟାଳୟ କର୍ମ ସହ,

ତୋ ଲାଗି ଯେ ଥିବ ନିଶ୍ଚୟ ମିଳିବ

ଆଖିରୁ ପୋଛିଦେ ଲୁହ ।

କଥା ମାନି ତା'ର ଆଗକୁ ବଢ଼ିଲି

କରିଲି ଜନଙ୍କ ସେବା,

ସହରର ଏଇ ଗହଳିରେ ଥାଇ

ଶିଖିଲି ଅନ୍ୟକୁ ଦେବା ।

ପରିବାର ଲୋକ କଥା ବି ବୁଝୁଛି

ଜୀବନ ଜଞ୍ଜାଳମୟ,

ସଂକ୍ଷେପରେ କିଛି କହିଲି ବାନ୍ଧବୀ

ତୁମେ ସେଠି ସୁଖେ ଥାଅ ।।