ହେ ଆନନ୍ଦମୟ!(ଭାଗ -୪)
ହେ ଆନନ୍ଦମୟ!(ଭାଗ -୪)
ତୁମର ଆଦେଶେ ଗ୍ରହ ଚନ୍ଦ୍ର ତାରା
ହୋଇଥାନ୍ତି ଆତଯାତ
ସୁନ୍ଦର ଶୋଭାରେ ଆନନ୍ଦ ହୁଅଇ
ଆମର ସାରା ଜଗତ ll୨୩ll
ମନରେ ଉଲ୍ଲାସ ଆହେ ଜଗଦିଶ
ତୁମର ଆଶିଷ ଝରେ
ନୀଳ ଆକାଶର ନିର୍ମଳ ଗଗନ
ବର୍ଷନ୍ତି ବରଷା ଧାରେ ll୨୪ll
ନୀଳ ବଉଦର ମେଘମାଳା ଗାଏ
ମଧୁର ଗୀତ ତୁମର
ବିଜୁଳି ନାଚଇ ମନର ହରଷେ
ବାଜଇ ତାର ନୁପୁର ll୨୫ll
ବରଷା ରାଣୀର ମଧୁର ସଙ୍ଗୀତ
ବୈକୁଣ୍ଠ ରାଜାଙ୍କୁ ମୋହେ
ଶୀତଳ ସମୀର ଆଣିକି ବାରତା
ସଭିଙ୍କ କାନରେ କୁହେ ll୨୬ll
ଅମୃତ ବେଳାର ଶୁଭ ଲଗନରେ
କୋଇଲି ବୀଣା ବଜାଏ
ମଳୟ ପବନ ଧୀରେ ଧୀରେ ବହି
ଶୀତଳ ସମୀର ଦିଏ ll୨୭ll
ପବିତ୍ର ଧରାରେ ସୁନ୍ଦର ଯୋଜନା
ହୋଇଅଛି ଦେଖ ଭାଇ
ଧନ୍ୟ ଏ ଜୀବନ ଦେଖୁଛି ନୟନେ
ମନଲୋଭା ଦୃଶ୍ୟ ପାଇ ll୨୮ll
ତୁମେ ନାରାୟଣ ସକଳ କାରଣ
ଗତି ଓ ମୁକ୍ତିର ଦାତା
ସକଳ ଜନଙ୍କୁ ସୁଖ ଦେବା ପାଇ
ସାଜିଛ ଭାଗ୍ୟ ବିଧାତା ll୨୯ll
ଅମର ପଦକୁ ତ୍ୟାଗ କରି ତୁମ୍ଭେ
ଭକତ ସାଥିରେ ବିଜେ
ଦୁଃଖ ଶୋକ ହର ଏ ସାରା ଜଗତେ
ବିଜୟ ଡଙ୍କା ବାଜେ ll୩୦ll
ମାନବୀୟ ଲୀଳା ଅବନୀ କୋଳରେ
ହେଉଅଛି ମୁଖରିତ
ଭକ୍ତ ଭଗବାନ ସମ୍ପର୍କ ପାଇଁ କି
ହସୁଛି ସାରା ଜଗତ ll୩୧ll