ଲାଇବ୍ରେରୀ
ପ୍ରୋଫାଇଲ୍
ମୋ କାହାଣୀ
ମୋ କାହାଣୀ
ଶୁଣ ମୋ କାହାଣୀ ଦେଶ ଜନତା
କରିଅଛି ମୋତେ ଜଗତ ଜିତା
ମାତା ବକ୍ଷ ସ୍ଥିତ ପାନ ଅମୃତ
ଆଶ୍ରୟର ସ୍ଥଳ ରମ୍ୟ ପଣତ
ଦେଇଅଛି ସ୍ନେହ ଶ୍ରଦ୍ଧା
ମାଆ ଶବ୍ଦ ଗୋଟି ଅମାପ ବଳ ମୋ
ଆସେ ନାହିଁ କେବେ ବାଧା ll୧ll
ପିତା ମାତା ଅଙ୍କ ମୋ ଶ୍ରୀମନ୍ଦିର
ପୁଣ୍ୟ ତୀର୍ଥ ଧାର ତାଙ୍କ ପୟର
ମୋ ଘର ଅଗଣା ଜ୍ଞାନ ଭଣ୍ଡାର
ଗାଆଁ ଦାଣ୍ଡ ଧୂଳି ଚନ୍ଦନ ମୋର
ବରଗଛ ଦୋଳି ଖେଳ
ପିଇଅଛି ଜଳ ନଦୀ ଝରଣାରୁ
ସାଙ୍ଗ ସଖା ସାଥେ ମେଳ ll୨ll
ଦେଶ ସେବା ମୋର ଜୀବନ ଲକ୍ଷ
ପରଉପକାରେ ଆତ୍ମର ମୋକ୍ଷ
ଧୂପ ସମ ଜଳି ଜ୍ୟୋତି ପ୍ରଦାନ
ମାଆଁ ମାଟି ପାଇଁ ତ୍ୟାଗ ଜୀବନ
ଲେଖିବି କର୍ମେ କାହାଣୀ
ଧର୍ମ ମାଟି ରକ୍ଷା ହେଉ ମୋର ଦୀକ୍ଷା
ସତ୍ୟ ସିଦ୍ଧ ହେଉ ବାଣୀ ll୩ll
ପୂରୁବ ଗୌରବ ଜାତି ଚେତନା
ବନ୍ଦେ ମାତାରମ ପ୍ରାଣେ ଧାରଣା
ରଖିବାକୁ ପଣ ନର ଜନମେ
ସାଧନା ତପସ୍ୟା ଫଳୁ କରମେ
ମାଗୁଅଛି ବରଦାନ
ପିତୃ ଋଷି ଦେବ ତିନି ଋଣ ଶୁଝେଁ
ଦୟାକର ଭଗବାନ ll୪ll
ପିତା ମାତା ସେବା ରକ୍ଷା ମୋ ଧର୍ମ
ସମାଜରୁ ଶିକ୍ଷା ଲଭିବା କର୍ମ
ମରିଯିବି ପଛେ ବାସ ବିତରି
ଭବ ଡ଼ଙ୍ଗାରେ ମୁଁ ସାଜେଁ ନାଉରୀ
ଜୀବନ ହେଉ ମୋ ଧନ୍ୟ
ଭାରତ ଜନନୀ ପଞ୍ଚ ମହାଭୂତ
ହେଉ ସଭିଙ୍କର ମାନ୍ୟ ll୫ll
କେତେ ଜପ ତପ ପୁଣ୍ୟର ଫଳେ
ଜନମ ଲଭିଛି ମାଟିର କୋଳେ
ତୋ ମାଟି ଟିକକ ମୋର ଚନ୍ଦନ
ଚରଣ ତଳେ ମାଁ କରେଁ ବନ୍ଦନ
ଏତିକି କାମନା ମୋର
ଜୀବନ କାହାଣୀ କରୁଛି ମାଗୁଣି
ତୁମ ମାଟି ସ୍ୱର୍ଗ ପୁର ll୬ll
ଜୀବନୁ ମରଣ ମା ସେବା ମମ
ବ୍ରତ ହେଉ ମୋର ପୁଣ୍ୟର ଧାମ
ଜାଣିଛି ମାଆ ଗୋ ସ୍ୱର୍ଗ ଠୁଁ ବଡ଼
ମାତା ଦଶଭୁଜା ତୁ ମୋକ୍ଷ ଗଡ଼
ତୋର ଦୁଃଖେ ସୁଖେ ମାଆଁ
ଶତ୍ରୁ ଗର୍ବ ଭାଙ୍ଗି ବିଜୟ କେତନେ
ଧ୍ବଂସ ହେଉ ମୋର ନାଆଁ ll୭ll
