ବଳିଦାନ

ମାଟିର ମଣିଷ  ମାଟିରେ ମିଶିବା

    ହୋଇଯିବା ବଳିଦାନ

ଦେଶ ସେବା ପଣ  ଯଶ ମାନ ଗୁଣ

    ବଞ୍ଚାଇବ ସ୍ୱାଭିମାନ l

ରକ୍ତରେ ସ୍ବାଧୀନ  ରକ୍ତରେ ଜୀବନ

    ରକତରେ ଲେଖା ନାମ

ମାଟିର ସୁରକ୍ଷା  ମାଟିର ମମତା

    ମଣିଷ ଜୀବନେ କାମ l

ମାଆ ମାଟି ଭାଷା ଏ ସାରା ସଂସାରେ

      ପରିଚୟ ମହିୟାନ

ମୋ ଦେଶ ସୈନିକ ବନ୍ଦେ ମାତାରମ

    ମାକୁ କରେ ଗରୀୟାନ l

ଗଗନେ ପବନେ  ଫର ଫର ଉଡ଼େ

     ରାଷ୍ଟ୍ର ବିଜୟ ପତାକା

ଜାତୀୟ ସଙ୍ଗୀତ କୋଟି କଣ୍ଠେ ଶୁଭେ

     ସିଏ ତ ଭବ ନଉକା l

ଗୁଡ଼ୁମ ଗୁଡ଼ୁମ   କମାଣ ଗର୍ଜନେ

    ଯୁଦ୍ଧ ଭୂମି ଥର ହର

ଭାରତ ମାତାର  ଶୁଭ ଶଙ୍ଖ ଧ୍ୱନୀ

    କରେ ବିଜୟ ଝଙ୍କାର l

ଭୁଲ ନାହିଁ ବନ୍ଧୁ  ବଳିଦାନ ଗାଥା

    କହୁଅଛି କାନେ କାନେ

ରକତ ଡାକୁଛି   ରକତକୁ ଆଜି

    ହେଜ ବାରେ ତନୁ ମନେ l

ମୋର ବୋଲି ଯାହା  କହୁଅଛ ଆଜି

    ନୁହେଁତ ତାହା ତୁମର

ଏ ଦେଶ ଜନତା  ପାଳିଛି ପୋଶିଛି

    ନୁହଁ ତୁମ୍ଭର ଗୋଚର l

କିଏ ପର ଆଜି  କିଏ ବା ନିଜର

    ସର୍ବେ ଏକ ପରିବାର

ମାଟି ଶିଖାଉଛି   ବସୁଧା ବାସୀଙ୍କୁ

   ମୋ ଘର ମମତା ଦ୍ୱାର l

ପୂରୁବ ଗୌରବ  ପୂରୁବ ବୈଭବ

    ରଚିଅଛି ଇତିହାସ

ତୋ କାର୍ଯ୍ୟକୁ ଦେଖି  ହେ ସିଂହ ସନ୍ତାନ

    ମୋତେ ଲାଗୁଅଛି ହସ l

ମନେ ପକାତୋର  ଶୋର୍ଯ୍ୟ ପରାକ୍ରମ

    ବାୟୁ ପୁତ୍ର ହନୁମାନ

ସମୁଦ୍ର ଡେଇଁଲେ  ମାତା ଠାବ ପାଇ

   ରାମ ନାମ କଲେ ଗାନ l

କନ୍ଧ ମୁଣ୍ଡା ଭିଲ  ପାଇକ ବୀରର

   ଯୁଦ୍ଧ ଖୋର ରଣନୀତି

ଭାରତ ସୁପୁତ୍ର  ବଳିଦାନ ହୋଇ

    ଶିଖାଏ ଦେଶ ଭକତି l

ନିଜ ଚିନ୍ତା ଖାଲି  ଘାରୁଅଛି ଆଜି

    ସ୍ୱାର୍ଥ ଚିନ୍ତା କରେ ବନ୍ଦୀ

ନିଜ ଦୋଷ ଛାଡ଼ି  ଅନ୍ୟର ଦୋଷକୁ

    ବଞ୍ଚୁଅଛୁ ତୁହି ନିନ୍ଦି l

ଛାଡ଼ିଦେ ତୋହର  କୁକୁର ପ୍ରକୃତି

    ନ ହୁଅ ଅଇଁଠା ଚଟା

ସତ୍ୟ ଧର୍ମ ପଥ  ଆଦର ସୋଦରେ

   ବୋଲାଅ ଭାରତ ବେଟା l