ହେ ଆନନ୍ଦ ମୟ (ଭାଗ -୧୨)

ଗଙ୍ଗା ସରସ୍ବତୀ  ସିନ୍ଧୁ ଓ ନର୍ମଦା

    ବ୍ରହ୍ମପୁତ୍ର ଗୋଦାବରୀ 

ଦେବୀ ଗୋ ଯମୁନା ରେବା ମହାନଦୀ

   ଗଣ୍ଡକୀ କୃଷ୍ଣା କାବେରୀ l

ପୁଣ୍ୟମୟୀ ତୁମେ ମୋକ୍ଷ ପ୍ରଦାୟିନୀ

    ସ୍ୱର୍ଗୁ ମର୍ତ୍ତେ ଅବତରୀ

କୋୟଲ ଶଙ୍ଖରେ  ବୈତରଣୀ ମିଶି

     ତ୍ରିବେଣୀ ଦିଅନ୍ତି ବାରି l

ହିମାଳୟ ଠାରୁ   ଜନ୍ମିଲ ଦେବୀଗୋ

     ପତିତପାବନୀ ନାମ

ପୁଣ୍ୟ ଗଙ୍ଗୋତ୍ରୀରେ କରିଲେ ସ୍ନାହାନ

   କେବେ ନିଏ ନାହିଁ ଯମ l

କୋଟି ଜନ୍ମଫଳେ  ଦର୍ଶନ ଲଭିଛୁ

     ପବିତ୍ର ଗଙ୍ଗାର ଜଳ

ମୋକ୍ଷ ପ୍ରଦାୟିନୀ  ଜଗତ ଜନନୀ

   ଆତ୍ମାଟି ପାଏ ସଫଳ l

ଯୁଗ ଯୁଗ ଧରି   ତ୍ରିତାପ ହାରିଣୀ

    କର ମାନବେ ଉଦ୍ଧାର

କରୁଣା ମଇଗୋ  ପ୍ରୟାଗ ରାଜରେ

   ସ୍ନେହ ମୟୀ ପାରାବାର l

ଶିବଙ୍କ ଜଟାରୁ   ଉଦ୍ଗମ ପୁଣିଗୋ

    ପ୍ରଭୁ ହେଲେ ଗଙ୍ଗାଧର

ଧନ୍ୟ ମହାଦେବୀ  ଶିବଙ୍କ ସଙ୍ଗିନୀ

    ପାଦ ସେବ ମହେଶ୍ୱର l

ତୁମର ପ୍ରାର୍ଥନା  ତୁମ ଆରାଧନା

    କରନ୍ତି ସକଳ ଜୀବ

ମୁକ୍ତି ଦାତ୍ରୀ ତୁମେ ଗତି ପ୍ରଦାୟିନୀ

   ଉଦ୍ଧାର ସଂସାର ନାବ l

ନମାମି ଗୋ ଗଙ୍ଗେ ଉଚ୍ଛଳ ତରଙ୍ଗେ

    ରୂପେଲି ହୀରକ ପରି

ସଂସାରେ ନାହାନ୍ତି  ଦୟାର ପ୍ରତିମା

    ନୁହେଁ କେହି ତୁମ ସରି l

ତୁମ ଗଙ୍ଗା ଜଳ  ଯେଉଁଠି ପଡ଼ଇ

    ହୋଇଥାଏ ସେ ପବିତ୍ର

ଯେତେ ଦେଖୁଥିଲେ ତୁମକୁ ଗୋ ମାଆ

    ପବିତ୍ର ନୟନ ଗାତ୍ର l

କରୁଛି ଆଳତି  ମୋ ମନ ମନ୍ଦିରେ

    ଆତ୍ମାକୁ ଚରଣେ ଥୋଇ

ଥରୁଟିଏ ମାଗୋ  ଆଶୀର୍ବାଦ କର

   ଯିବି ମୁଁ ଗୋ ମୋକ୍ଷ ହୋଇ l

ତୁମ୍ଭ ଦୟା ବଳେ ସାଗର ବଂଶଟି 

    ପାଇଲା ଗତି ମୁକତି

ତୁମ ଜଳ ପାନେ  ଦୁର୍ବଳ ପାଅଇ

    ଅମାପ ବଳ ଶକତି l

ରୋଗୀ ଜନଙ୍କର ରୋଗ ନିବାରଣ

     ଭୋଗୀଙ୍କ ଆତ୍ମ ତୃପ୍ତି

ଯୋଗୀ ମୁନୀ ରୁଷି  ଆବର ତପସ୍ବୀ   

ହୃଦୟେ ଦିଅ ଭକତି l