ଢଗରୁ ଗୀତ(୩)

ଖରକି ଆଣିଲେ ଚଉଁରା ତଳୁ ଲୋ

ମିଳିବ ତୁଳସୀ ବାସ,

ଖଳଜନ ମେଳେ ମେଳ କରୁଥିଲେ

ଗୁଣୀ ଗୁଣ ଯାଏ ନାସ।

ଖିଲିପାନ କୁ ଖଇର ସଙ୍ଗାତ ଲୋ

ଖିଲିପାନ କୁ ଖଇର,

ଖିଲିଖିଲି ହସ ବଡ଼ ମଧୁର ଲୋ

ଖୁଏଇ ଦେଲା ଦିଅର।

ଖଟ ତଳେ ଗଲା ବିଛା ବଉଲ ଲୋ

ଖଟ ତଳେ ଗଲା ବିଛା,

ପରଦେଶେ ଯାଇ ରହିଲେ ମୋ କାନ୍ତ

ପଲଙ୍କ ପଡିଛି ତୁଚ୍ଛା ।

ଖାଇଲା ପିଇଲା ଘର ର ଛୁଆ ତ 

ଖାଇବା ପରେ ବି ରଙ୍କ,

ନ ପାଇଲା ପିଲା ଆଙ୍ଗୁଳି ଚାଟୁଛି

ଚୋବେଇ କଖାରୁ ଡଙ୍କ।

ଖଟି ଖାଇଲାଣି ଯିଏ ବାଇନ ରେ

ଲୁଟିକି ଖାଇବ ନାହିଁ

ମାଗି ଖିଆ ଲୋକ ଲାଗି ଖାଇବାର

ଦେଖିଛୁ କି କେବେ କାହିଁ?

ଖଡ଼ି ଗଲା ଗଡ଼ି ଗଡ଼ି ବାଇନରେ

ଖଡ଼ି ଗଲା ଗଡ଼ିଗଡ଼ି

ଗାଁ'ଟା ଯାକର ଯେତେ ବୁଢା ବୁଢ଼ୀ 

ଆଜି ଯିବେ ପାଠ ପଢି।

ଖରାପିଠି ହେଇ ବସିଛି ବାଇନ

"ଖ" ରୁ ଲେଖିଛି ଢଗ

ଆଉ କିଛି ମିଳିଯିବ ମନେ ଭାଳି

ଧିଆନେ ବସିଛି ବଗ।