ଚିତ୍ର ଶିଳ୍ପୀ ସସ୍ମିତାମହାରଣା

ଓଡ଼ିଶା ପ୍ରସିଦ୍ଧ ଶିଳ୍ପ କଳାର ସହର

ବିଶ୍ୱେ ଖ୍ୟାତି ଲଭୁ ଅଛି ଯିଏ ନିରନ୍ତର ।

ରଘୁରାଜପୁର ସେହି ତା' କୋଳେ ଜନ୍ମିତ।

ମହାରଣା, ବଂଶେ ନାମ ତାହାଙ୍କ ସସ୍ମିତା ।

ହସ୍ତକଳା ପଟ୍ଟଚିତ୍ର ସୁମଞ୍ଜୁଳ ତର

ତୂଳୀ ରେ ତାହାଙ୍କ ଫୁଟେ ଔଜଲ୍ୟ ରୁଚିର ।

ଚିତ୍ରେ ରୁଚି ରଖୁଥିବା ପ୍ରତିଭା ପ୍ରଭାବ

 ଭରା ଯେ ଅନନ୍ୟ ସ୍ୱାକ୍ଷର, ସୁରଭି, ଭାବ ।

ରୁଚି ରସ ମୟ ଶୋଭା ପରିପୂର୍ଣ୍ଣ ବିଭା

ମୁଗ୍ଧ କର ଲାଳିତ୍ୟର ସୁଲଳିତ ପ୍ରଭା ।

ପ୍ରକଟିତ ଚିତ୍ର ଆଙ୍କି ପ୍ରକାଶନ୍ତି ଦିବ୍ୟ

ଚେତନା, ମୂଳକ, କଳା କୌଶଳ ପାଟବ ।

କାରୁ କମ କାରିଗରି ବର୍ଣ୍ଣାଢ଼୍ୟ ପାଟବେ

ଅଙ୍କନ୍ତି ସେ ଚିତ୍ର କଳା ସୁବିପୁଳ ଭାବେ ।

ଶୋଭା, ବିଭା, ବର୍ଣ୍ଣ, କାନ୍ତି, ଦ୍ୟୁତୀ ଓ ଔଜଲ୍ୟ

ରମ୍ୟ ମନୋରମ ଦୃଶ୍ୟ ଅତୀବ ଅମୂଲ୍ୟ ।

ସୂକ୍ଷ୍ମ କଳା କଉଶଳୀ ଶିଳ୍ପୀ ସେ ସସ୍ମିତା

ବିସ୍ମିତ କରନ୍ତି ଆଙ୍କି ଚିତ୍ର ପାଟବତା ।

ପୁରୀ ଜିଲ୍ଲା ରଘୁ ରାଜ ପୁର ଗ୍ରାମ ଠାରେ

ଜନ୍ମ ଉଣାଇସ ଶହ ତେୟାଅଶୀ ମସିହାରେ ।

ପିତା ତାଙ୍କ କ୍ଷେତ୍ରବାସୀ ମାତା କୁମୁଦିନୀ 

ଆବାଲ୍ୟରୁ ଶିଳ୍ପ ଆଉ, ଚିତ୍ର ଅଭ୍ୟାସିନୀ ।

କୌଳିକ ବୃତ୍ତିର ପରି ପ୍ରସାର ପାଇଁ କି

ପଣ କରି ଚିତ୍ରାଙ୍କନେ ପ୍ରବୃତ୍ତ ଅଛନ୍ତି ।

ବହୁ ଶ୍ରମ କରି ହସ୍ତ ଶିଳ୍ପ ନିର୍ମାଣନ୍ତି 

ପ୍ରଗାଢ଼ ଉଦ୍ୟମ ଏକାଗ୍ରତା ମୂର୍ତ୍ତିମତି ।

ହୋଇ ଉକୁଟାଏ, ରସ ସ୍ନିଗ୍ଧ ଚାରୁ ଧାରା

ଦର୍ଶନେ ତୃପ୍ତି ରଞ୍ଜନ, ମନ ନେତ୍ର କାରା ।

କଳାର କାଉଁରୀ ସ୍ପର୍ଶେ ବର୍ଣ୍ଣାଢ଼୍ୟ ବରଣ

ସସ୍ମିତାଙ୍କ ଚିତ୍ରାବଳି ଜିଣେ ଜନ ମନ ।

ବହୁ ଛାତ୍ର ଛାତ୍ରୀଙ୍କୁ ସେ ଦିଅନ୍ତି ପ୍ରେରଣା

ଚିତ୍ର କଳା ପ୍ରଶିକ୍ଷଣେ ନବ ସମ୍ଭାବନା ।