ଚହଟ ଚମ୍ପା ହୁଅନା ଖପା ତୁଛାକୁ ଆଉ ଏତେ

ଚହଟ ଚମ୍ପା ହୁଅନା ଖପା ତୁଛାକୁ ଆଉ ଏତେ

କହିଲେ ମତେ ବୁଲେଇଦେବି ବଜାର ସାରା ସତେ

..........ଚହଟ ଚମ୍ପା ହୁଅନା ଖପା 

                  ତୁଛାକୁ ଆଉ ଏତେ ! ୦ !

କିଣେଇଦେବି ନାଲିଆ ପାଟ ମାନିବ ଦେହ ଗୋରା

ପିନ୍ଧିଲେ ନିଶ୍ଚେ ଝଟକି ଯିବୁ ବାହାର ଆଖି ଟେରା

ହସିଦେ ଟିକେ ରୁଷାକୁ ଛାଡ଼ି ଛାଟନା ଆଉ ହାତେ

..........ଚହଟ ଚମ୍ପା ହୁଅନା ଖପା 

                  ତୁଛାକୁ ଆଉ ଏତେ ! ୧ !

ଖୁଆଇଦେବି ଯାହା କହିବୁ ମିଠାକି ହଉ ଖାରା

ହୋଟେଲ୍ ରନ୍ଧା ଖାଇବୁ ଯଦି ଆପତ୍ତି ନାହିଁ ପରା

ପାଦ କଚଡ଼ା ସେତିକି ଥାଉ ବାଧୁଛି ଆହା କେତେ

..........ଚହଟ ଚମ୍ପା ହୁଅନା ଖପା 

                  ତୁଛାକୁ ଆଉ ଏତେ ! ୨ !

ହାର କିଣିଲେ କିଣେଇଦେବି ଦେଇଦେ ଗୋଟେ ଚୁମା

ବାହୁ ହାରଠୁ ସେଇ ହାରଟା ଅଧିକା ନୁହେଁ ଜମା

ଆଖିରେ ଆଖି ଯୋଖିଦେ ଗୋରୀ ବିଶ୍ବାସ ନେଇ ମତେ

..........ଚହଟ ଚମ୍ପା ହୁଅନା ଖପା 

                  ତୁଛାକୁ ଆଉ ଏତେ ! ୩ !