ବିଭୋର ପ୍ରିୟତମା

ଝିପି ଝିପି ହୋଇ ବର୍ଷା ପଡିଲାଣି

ମନ ହୋଇଲାଣି ଖୁସି

ଫୁଟି ଉଠିଲେଣି ପ୍ରୀତିପୁଷ୍ପ ଦେଖ

ଜହ୍ନ ଉଠିଲାଣି ହସି I

ଭିଜିଲାଣି ଦେଖ ପ୍ରିୟା ଦେହ ମନ

ଶ୍ରାବଣର ଛୁଆଁ ପାଇ

ପ୍ରଣୟ ବିଭୋର ମନତଳେ ତାର

ଫୁଟିଲେଣି ଜାଇ ଜୁଇ I

ଆଖିରେ ସପନ ବସା ବାନ୍ଧିଲେଣି

ଦେହେ ଲାଗିଲାଣି ନିଆଁ

ଆଖିର କଜ୍ଜଳ ସଜ୍ଜଳେ ଚାହିଁଛି

ଖୋଜୁଛି ପୀରତି ଛୁଆଁ I

ଝରକା ଫାଙ୍କରୁ ଉଙ୍କି ମାରିଲାଣି

ତୋଫା ତୋଫା ତାର ମୁହଁ

ଅଳସ ପାଦରେ ଅଳପ ଚାଲୁଛି

ଭାରି ଲାଗିଲାଣି ଦେହ I

ମେଘ ଆଣିଥିଲା ପ୍ରିୟର ବାରତା

କାନରେ ଦେଇଛି କହି

ମନ କଥା ତାର ମନରେ ରହିଛି

ହସିଲେଣି ଆଖି ଦୁଇ I

ସରି ସରି ଆସେ ରାତିର ଆୟୁଷ

ଅନ୍ଧାର ଦେଉଛି ହସି

କାନେ ପଡିଲାଣି ସୁମଧୁର ସ୍ୱର

ମିଳନ ମୋହନ ବଂଶୀ I