ଲାଇବ୍ରେରୀ
ପ୍ରୋଫାଇଲ୍
ଭ୍ରମ
ଭ୍ରମ
1 min
256
ଯେତେ ଥର
ଚାହିଁଲି ଆଇନାକୁ
ଦେଖାଗଲା ତମ ମୁହଁ
ଯାହା କେବେ ଦେଖି ନାହିଁ
ଶୁଭୁଥିଲା ବାହାରୁ
ତମେ ଡାକିବାର
କେବେ କେବେ
ପାଦ ଶବ୍ଦ ତମର
ଯାହା କେବେ ଶୁଣି ନାହିଁ
ଅଥଚ ଏକାନ୍ତ
ପରିଚିତ ମୋର
କେବେହେଲେ ଭୁଲି ନ ହେବାର
ମୁହଁ ଫେରେଇ
ଚାହିଲା ବେଳକୁ
ତମେ ନୁହଁ. ତମେ ନୁହଁ
ଏବଂ କେହି ନୁହଁ ॥
ତମ ସହ
ଦେଖା ହେବ ବୋଲି
ରାତି ଦିନ
ଦିନ ରାତି ମୋର
ଗୋଟେ ହିଁ ସମୟ
ଦୂରକୁ ଆସିଲେ
ଆଖିଯାକ ଛଳ ଛଳ ଲୁହ
ଛାତି ଯାକ କୋହ
ନିଜକୁ ବି ଶୁଣେଇବି
ନାନାବାୟା କେତେ
ତମେ ଆସିବାର
ମୂହୁର୍ତ୍ତକୁ ଆଖିରେ ସାଇତି
ଅଥଚ ସେ ପଲକ
ଟେକିଲା ବେଳକୁ
ତମେ ନୁହଁ. ତମେ ନୁହଁ
ଏବଂ କେହି ନୁହଁ ॥
ସହସ୍ର ସ୍ଵପ୍ନର
ଦର ଆଉଜା କବାଟକୁ ଧରି
ନିରେଖିଛି ମୁଁ ଯେ
ତମ ଆସିବାର ବାଟ
ତମେ କଣ ବୁଝୁ ନାହିଁ
ଏଇ ମୋର “ମୁଁ”ର ଅସ୍ତିତ୍ୱ
ତମର ସେ ଆସିବା ବାଟରେ
ଆଉ ସବୁ କାମନାକୁ
ଫିଙ୍ଗି ଦେଇପାରେ,
ପୁଣି ସ୍ମୃତିର ସ୍ୱପ୍ନରେ
ତମ କଥା ଭରିପାରେ
ସ୍ଵପ୍ନ ତୁଟିଗଲେ
ତମେ ନୁହଁ. ତମେ ନୁହଁ
ଏବଂ କେହି ନୁହଁ ।।
