ଭଲପାଏ ବୋଲି

କେବେ ଭାବନାରେ କେବେ ସପନରେ

ହୃଦୟକୁ ଛୁଇଁଯାଉଛ ତୁମେ

କେମିତି କହିବି ଭଲପାଏ ବୋଲି

ଲାଜେ ସରିଯାଏ ତୁମରି ନାମେ ।

ନିଦାଘ ସଞ୍ଜରେ ତନୁମନ ମୋର

ଶୀହରିତ ହୁଏ ବିନା ବର୍ଷାରେ

ପ୍ରୀତି ଆବେଗରେ ଜଳି ଉଠେ ହିଆ

ଶୀତୁଆ ରାତିର ଶେଷ ପ୍ରହରେ ।

ଶ୍ରାବଣ ପରଶେ ମୋ' ମନ ମୟୂରୀ

ତୁମ ପ୍ରତୀକ୍ଷାରେ ବିରହେ ଜଳେ

ଫଗୁଣ ଆସିଲେ ତୁମ ପ୍ରୀତି ରଙ୍ଗ

ଦେହକୁ ରଙ୍ଗେଇ ମୋ ସାଥେ ଖେଳେ ।

ବସନ୍ତ ଆସିଲେ ଫୁଲ ଗହଣରେ

ନାଚିଉଠେ ମନ ତୁମ ସ୍ମୃତିରେ

କେମିତି କହିବି ହଜେଇ ଦେଇଛି

ନିଜକୁ ମୁଁ ଆଜି ତୁମ ପ୍ରେମରେ ।