ଅଦିନିଆ ବର୍ଷା
ଅଦିନିଆ ବର୍ଷା
ବର୍ଷା !
କ'ଣ ସତରେ ତୁମେ ଆସିଛ !
ନା ଆକାଶର ସବୁ
ମୃତ ଅଭିପ୍ସାମାନ ପୁଞ୍ଜିଭୂତ ହୋଇ
ଝରିଯାଉଛି ଲୁହ ଭାବରେ !
ଆକାଶର ଛାତି ଭିତରେ
ଲୁଚି ରହିଥିବା ତମାମ୍ ଯନ୍ତ୍ରଣା ସବୁ
ଘନୀଭୂତ ହେବା ପରେ
କେବଳ ନିଜ ସ୍ଥାନ ପରିବର୍ତ୍ତନ ପାଇଁ
ଦେଇ ନାହାଁନ୍ତି ତ ତୁମକୁ ନିମନ୍ତ୍ରଣ !
କୁହ ବର୍ଷା !
ଏ ଅବେଳାରେ ତୁମ
ଆଗମନର କାରଣ କ'ଣ !
ଶରତର ନିର୍ମଳ ଆକାଶରେ
କାହିଁକି ବା ଆଜି
ମେଘର କଳଙ୍କିତ ସ୍ଵାକ୍ଷର !!
ଥରେ ନଈ ପଠାରେ ବୁଲି ଦେଖ ତ
ତୁମ ଆସିବାର ଖବର ପାଇ ,
ମଉଳିଯାଇଛି
କାଶତଣ୍ଡୀର ଶୁଭ୍ର ହାସ୍ୟ ସମ୍ଭାର ,
ଏତେ କଷ୍ଟ ପରେ ତ
ଭୁଲିବାକୁ ବସିଥିଲେ ସବୁ
ଶ୍ରାବଣର କୋପ,
ତୁମେ ପୁଣି ଆସିଲନି ଯେ ,
କ୍ଷତ ସବୁକୁ ପୁଣି ଥରେ
ପୁନର୍ଜୀବିତ କରିଦେଲ !
ପୁଣି ଉଜାଣି ବହିଲା
ଲୁହର ନଦୀ ,
ଏବେ ଏବେ ତ ଛାଡ଼ିଥିଲା ବନ୍ୟା
କ୍ଷୟକ୍ଷତିର ଆକଳନ ମଧ୍ୟ
ସରିନି ଠିକ୍ ରୂପେ ,
ସେଥିରେ ବୋଝ ଉପରେ
ନଳିତା ବିଡ଼ା ସାଜି
କ'ଣ ବା ହୋଇପାରେ ,
ତୁମ ପୁନଃଆଗମନର
ଆନ୍ତରିକ ମନସ୍କାମନା !!!