ଓଡ଼ିଆ ଜାତିର ଲଢୁଆ ବୀର- 08: ଗୁରୁବାରୀ ମେହେର

ସୋନପୁର ରାଜା ମାରୁଥିଲେ ମଜା ପ୍ରଜାଙ୍କୁ କଷଣ ଦେଇ,

ଅନ୍ଧାରୀ ଶାସନ ଟିକସ କଷଣ ପ୍ରଜା ପାରିଲେଣି ସହି |

ଇଂରେଜ କମ୍ପାନୀ ହାତରେ ଲଗାମ ପ୍ରତିବାଦ କଲେ ଦଣ୍ଡ,

ମେଳି-ଗଣ୍ଡଗୋଳ ଅପରାଧ କଲେ କାଟି ନିଆଯାଏ ମୁଣ୍ଡ |

ବଢି ଚାଲିଥିଲା ଶାସକ ଜୁଲୁମ ଟିକସର ପରିମାଣ,

ଜନ ଅସନ୍ତୋଷ ଦାନା ବାନ୍ଧିବାନ୍ଧି ରୂପନେଲା ଆନ୍ଦୋଳନ |

ଅନ୍ୟାୟ ଟିକସ ପ୍ରତିବାଦ କରି ବାହାରିଲା ପଟୁଆର,

ଗୁରୁବାରୀ ବୁଢୀ ଆଗରେ ଚାଲିଛି ହାତରେ ପତାକା ତା’ର |

ମାଆ ଗୁରୁବାରୀ ପ୍ରେରଣା ଦାୟିନୀ ଯୁବକ ଉଠିଲେ ମାତି,

ଜୀବନ ଦେବାକୁ ଶପଥ କରିଲେ ଫୁଲାଇ ନିଜର ଛାତି |

ଘେରାଉ କରିଲେ ପୁଲିସ ଦଳକୁ ଦାନଗଦି ଯୁବନେତା,

ଲାଠିମାଡ଼ ଆଉ ବନ୍ଧୁକ ମୂନରେ କେତେ ହରାଇଲେ ଚେତା |

ପୁଲିସ ମାଡ଼କୁ ଖାତିରି ନକରି ଦେଲେ ଜୟଧ୍ଵନି ମାନ,

ଆଦେଶ ଆସିଲା-ଉଠାଅ ବନ୍ଧୁକ ନିଅ ଆଗ ବୁଢୀପ୍ରାଣ |

ପୁଲିସ ଭୁଷିଲା ମାଆର ପେଟରେ ବାୟୋନେଟ ଗଲା ଗଳି,

‘ପୋଡ଼ିଯାଉ ତମ ଶାସନ ନିୟମ’ କହି ସେ ପଡ଼ିଲା ଢଳି |

ଭୁଲି ପାରିବା କି ମାଆ ଅବଦାନ ସେଦିନ ତ୍ୟାଗର କଥା ?

ଯୁଗଯୁଗ ପାଇଁ ସେହି ମାଆ ପାଦେ ରହିଥାଉ ଆମମଥା |