ଓଡ଼ିଆ ଜାତିର ଲଢୁଆ ବୀର-28: ରଘୁ-ଦିବାକର
ଓଡ଼ିଆ ଜାତିର ଲଢୁଆ ବୀର-28: ରଘୁ-ଦିବାକର
ଗଡ଼ଜାତ ରାଜ୍ୟ ରଣପୁରଠାରେ ଚାଲେ ଅନ୍ଧାରି ଶାସନ,
ରାଜା ବୋଲି ଯିଏ ନିଜସୁଖ ପାଇଁ କଲେ ପ୍ରଜାଙ୍କୁ ଶୋଷଣ ।
ଟିକସ ଆଦାୟ ମାଗଣ ସଂଗ୍ରହ ରାଜା ନେଉଥିଲେ ଭେଟି,
ଶିକାର କାମରେ ଶାସନ ନାମରେ ପ୍ରଜା ଖଟୁଥିଲେ ବେଠି ।
କୁହୁଳି କୁହୁଳି ଅଶାନ୍ତିର ନିଆଁ ଜଳିଉଠେ ଦାଉଦାଉ,
ଝାସଦେଲେ ବୀର ରଘୁ-ଦିବାକର ନେତାଥିଲେ ଯିଏ ଆଉ ।
ତେଜିଲା ବିଦ୍ରୋହ ହେଲା ଅଣାୟତ ମାତିଲା ପ୍ରଜାମଣ୍ଡଳ,
ଲୋଧାଚୂଆଠାରେ କଟାଗଛ ରଖି ବାଟକୁ କଲେ ଅଚଳ ।
ବିଦେଶୀ ଫଉଜ ବେଜେଲ ସାହେବ ଦେଖାଇଲେ ତାଙ୍କ ବଳ,
ଅର୍ଜୁନ ରାଉତ ଗୁଳିରେ ଟଳିଲେ ଲଗାଇ ଆତଙ୍କ ଗୋଳ ।
ମାତିଲେ ଜନତା ଚାଳ-ବାଉଁଶରେ ଆଖିବୁଜି ଗଲେପିଟି,
ସେହି ପାହାରରେ ବେଜେଲ ସାହେବ ଧୂଳିରେ ପଡ଼ିଲେ ଲୋଟି ।
ପଡ଼ିଲା ଚହଳ ବିଲାତ ସଂସଦେ ଲାଗିଲା ଦମନ ଲୀଳା,
ବିଦ୍ରୋହୀ ନେତାଙ୍କୁ କଳାପାଣି ପୁଣି କାରାଦଣ୍ଡ ଦିଆଗଲା ।
ଭାଗଲପୁରରେ ରଘୁ ଦିବାକର ଫାଶୀ ଖୁଣ୍ଟେ ଦେଇପ୍ରାଣ,
ଦୁଇଜଣ ବୀର ଓଡ଼ିଆ ସହିଦ ଓଡ଼ିଶାକୁ କଲେ ଧନ୍ୟ ।