ଓଡ଼ିଆ ଜାତିର ଲଢୁଆ ବୀର-21: ବାଜି ରାଉତ
ଓଡ଼ିଆ ଜାତିର ଲଢୁଆ ବୀର-21: ବାଜି ରାଉତ
ଓଡ଼ିଶା ମାଟିର ଢେଙ୍କାନାଳ ରାଜ୍ୟ ନୀଳକଣ୍ଠପୁର ଘାଟ,
ବାର ବରଷର ବାଜି ରାଉତ ସେ ରଖିଲା ଜାତିର ଟେକ ।
କାହିଁକି କେମିତି ହୋଇଲା ଏମିତି କି’ଦୋଷ କରିଲା ବାଜି ?
ଇଂରେଜ ଅମଳ ପୁରୁଣା କାହାଣୀ ମନେ ପଡ଼ିଯାଏ ଆଜି ।
ଢେଙ୍କାନାଳ ରାଜା ଶଙ୍କର ପ୍ରତାପ ମହୀନ୍ଦ୍ର ସେ ବାହାଦୂର,
ଅନ୍ଧାରି ଶାସନ ଚଳାଇଲେ ବୋଲି ବଢିଲା ଦୁଃଖର ଭାର ।
କଟକ ଜିଲ୍ଲାର ଜେନାପୁରଠାରେ ବସିଲା ପ୍ରଜାମଣ୍ଡଳ,
ରାଜାଙ୍କ ସଇନ ଇଂରେଜ ଫଉଜ ସଭାକୁ କଲେ ବିଫଳ ।
ଭୁବନ ଗାଆଁରେ ପଶିଲେ ଫଉଜ ମାତିଲା ପ୍ରଜାଙ୍କ ମେଳି,
ପ୍ରଜାମଣ୍ଡଳର ନେତାଙ୍କ ଉପରେ ଫୁଟିଲା ବନ୍ଧୁକ ଗୁଳି ।
ଗୁଳିର ଚୋଟରେ ଢଳିପଡ଼େ ରଘୁ ତା’ପରେ ନାୟକ ଗୁରି,
ଚମକି ପଡ଼ିଲେ ଭୁବନ ଗାଆଁର ଥିଲେ ଯେତେ ନରନାରୀ ।
ନରହନ୍ତାମାନେ ଧାଇଁଲେ ଘାଟକୁ ପଳାଇବେ ରାଜାଗଡ଼,
ପ୍ରଜାମଣ୍ଡଳର ଆଦେଶ ହୋଇଲା କରିବେ ନାହିଁ କେ ପାର ।
ଭୁବନ ଗାଆଁର ବାପ ଛେଉଣ୍ଡ ସେ ଗରିବ ରାଉତ ପିଲା,
ପ୍ରଜାମଣ୍ଡଳର ବାନର ସେନାରେ ନିଜନାମ ଲେଖିଥିଲା ।
ପାହାନ୍ତା ବେଳକୁ ଫଉଜ ଆସିଲେ ନୀଳକଣ୍ଠପୁର ଘାଟ,
ଦେଖିଲେ ବାଳକ ଘାଟକୁ ଜଗିଛି ଓଗାଳିଲା ତାଙ୍କ ବାଟ |
କହିଲେ ରେ ପିଲା-ଶୀଘ୍ର ପାରି କର ମାଡ଼ି ଆସୁଛନ୍ତି ଲୋକ,
ବାଜିଆ କହିଲା-କରିବିନି ପାରି ପ୍ରଜାମଣ୍ଡଳର ଡାକ |
ବକଟେ ପିଲାର ଟାଣପଣ ଦେଖି ଫଉଜ ଧମକ ଦେଲେ,
ବନ୍ଧୁକ ଗୁଳିରେ ପ୍ରାଣନେଇ ତା’ର ଡଙ୍ଗା ଖୋଲି ନେଇଗଲେ |
ଶହଶହ କର୍ମୀ ମାଡ଼ି ଆସୁଥିଲେ ଫୁଟିଲା ଫଉଜ ଗୁଳି,
ହୃଷୀ, ନଟ, ଫଗୁ, ଲକ୍ଷ୍ମଣ ମଳିକ ଘାଟରେ ପଡ଼ିଲେ ଢଳି |
ଶତାବ୍ଦୀର ଫୁଲ ବାଳକ ବାଜିଆ ମରଣକୁ କରିଜୟ,
ଓଡ଼ିଶାର ଶିଶୁ କିଭଳି ସାହସୀ ଦେଲା ଜାତି ପରିଚୟ |