ସହରର ଖରାଦିନ

ବହୁତଳ ଉଚ୍ଚ ଅଟ୍ଟାଳିକା ପ୍ରଶସ୍ତ ସଡକ ପକ୍କା

ଜୀବନ ବ୍ଯସ୍ତବହୁଳ ସହରରେ ନାହିଁ ଫୁରୁସତ,

ଗୁଳୁଗୁଳି ଅସହ୍ଯ ଝାଞ୍ଜିରେ ଖରାଦିନ ସହରରେ

ଟପିଯାଏ ସବୁ ସୀମା କଲବଲ କରେ ବ୍ଯତିବ୍ଯସ୍ତ ।

ଶିଳ୍ପାଞ୍ଚଳ ସହରର ଉପକଣ୍ଠେ ଜମା କୁଢ କୁଢ

ଆବର୍ଜନା ଇତସ୍ତତଃ ଉଡୁଥିବା ପଲିଥିନ ଜରି,

ନଜର ପଡିଲେ ଲାଗେ ଫୁତ୍କାର ଛାଡୁଛି ଯେହ୍ନେ

ପୂତିଗନ୍ଧ ପ୍ରଦୂଷଣ ବିଷଧର ଅହିରାଜ ପରି ।

ଚାଲିବା ମରୁବାଲିରେ ନୁହଁଇ ସହଜସାଧ୍ୟ

ଦୁର୍ବିସହ ଖରାଦିନ ସହରରେ ଜୀବନଯାପନ, 

ପାଦେ ପାଦେ ଭଙ୍ଗାକାଚ କ୍ଷତାକ୍ତ କରିବା ଭୟ

ବ୍ଯତୀକ୍ରମ ସାମାନ୍ଯରେ ତରଳଇ ମହମ ଜୀବନ ।

ଲାଗେ ବେଶୀ ଖରାଦିନ ନିଷ୍ଠୁର ହୃଦୟହୀନ 

ସହରରେ ଜାଳିପୋଡି କରିଥାଏ ଡହଳବିକଳ, 

ହଜିଯାଏ ଆଖି ନିଦ ବାଟବଣା ହୁଏ ସ୍ବପ୍ନ 

ଯନ୍ତ୍ର ମାନବର ହୃଦ ଖୋଜେ ସ୍ନେହ ମମତା ଓ ଆଦର । ।