ଛଳନାର ପରିଣାମ

ପ୍ରେମରେ ଛଳନା ରହିଲେ ଅଳ୍ପରେ

    ପ୍ରୀତି ରଜ୍ଜୁ ଛିଡ଼ିଯାଏ 

 ସାରା ଜୀବନକୁ ଯନ୍ତ୍ରଣା ଜୁଇରେ

    ଜାଳି ଜାଳି ଚାଲିଥାଏ |

ଗୁଣ ଦେଖେ ନାହିଁ ରୂପରେ ମୋହିତ

    ପ୍ରୀତିର କାହାଣୀ ସବୁ 

ଯବନିକା ଆଣେ କାହାଣୀ ମଝିରେ

     ଲୁହ ଝରେ ଭାବୁ ଭାବୁ |

ଅଳପ ଦିନର ପ୍ରୀତିର ସପନ

     ଝାପ୍ସା ଝାପ୍ସା ଦେଖାଯାଏ 

ସନ୍ଦେହ ପରଳ ମାଡି ମାଡି ଯାଏ

     ମନେ କ୍ରୋଧ ଯାତ ହୁଏ |

ଅତୀତର ସ୍ମୃତି ମନେ ପଡେ ଯେବେ

    ଦଗ୍ଧ ହୃଦୟର ତଳେ 

ଯନ୍ତ୍ରଣାର କୋହେ ନିରବି ନିରବି

    କୃତ କର୍ମ ସବୁ ଭାଳେ |

ଅନ୍ୟ ପ୍ରତି ଦୋଷ ଢାଳେ ନାହିଁ କେବେ

    ନିଜକୁ ସେ ଦୋଷୀ କରେ 

ଆଗପଞ୍ଚ କିଛି ବିଚାର ନକରି

    ଦୁଃଖ ଆସେ ଚାଲିବାରେ |

ପ୍ରଥମେ କେହି ବି ଵୁଝି ପାରେନାହିଁ

    ଛଳନାର ରୂପ ରଙ୍ଗ 

ବିଶ୍ୱାସରେ ସବୁ ଆପଣାଇ ନେଇ

    ଢାଳିଥାଏ ପ୍ରୀତି ଅର୍ଘ୍ୟ |

କଥା ଚାତୁରୀରେ ଛଳନାର ଗନ୍ଧ

    ବୁଝିବା ସହଜ ନୁହେଁ 

ପ୍ରୀତିର ଢେଉରେ ମନ ନାଚିଥାଏ

    ଦେହ ଭିଜି ଭିଜି ଯାଏ |

ପ୍ରେମିକ ହେଉ ବା ପ୍ରେମିକା ବି ହେଉ

    ଜଣେ ତ ଛଳନା କରେ 

ନିଜ ସୁଖ ପାଇଁ ଅନ୍ୟ ଭରସାକୁ

    ତୁଚ୍ଛ ମଣି ଦୂର କରେ |

ଆଜିର ଯୁଗରେ ପ୍ରୀତି ଚାଲେ ସିନା

    ଅଧିକ ଛଳନା ଭରା 

ଜଣେ ବହୁ ଜଣେ ପ୍ରେମ କରେ ଏବେ

    ଚାଲିଛି ସଂସାର ସାରା |