Library
ଭାରତର ଜଣେ କର୍ମବୀର
ଭାରତର ଜଣେ କର୍ମବୀର
ଦକ୍ଷ ସେବକ ସେ ଅମ୍ଲାନ ଦାମ୍ଭିକ
ମୁକ୍ତି ସଂଗ୍ରାମ ଯୋଦ୍ଧା,
ଭାରତ ମାତର ସୁଯୋଗ୍ୟ ସନ୍ତାନ
କର୍ମବୀର ଅତିଗନ୍ଧା ।
ପଞ୍ଜାବ କେଶରୀ ଭାବେ ପରିଚିତ
ଅଗ୍ନିସମ ତେଜୋଦୀପ୍ତ,
ଦେଶ ସ୍ୱାଧୀନତା ପାଇଁ କରିଥିଲେ
ଜୀବନର ଶ୍ରେଷ୍ଠ ବ୍ରତ ।
ପଞ୍ଜାବ ରାଜ୍ୟରେ ଜନମି ଥିଲେ ସେ
ମୁନ୍ସୀ ରାଧାକୃଷ୍ଣ ପିତା,
ସରଳା ଗୃହିଣୀ ଗୁଲାବ ଦେବୀ ଯେ
ଅଟନ୍ତି ତାଙ୍କର ମାତା ।
ଖ୍ରୀଷ୍ଟାବ୍ଦ ଅଠର ଶହ ପଞ୍ଚଷଠି
ଜାନୁଆରୀ ଅଠlଇଶୀ,
ଧୂଡିକେ ନାମକ ସ୍ଥାନରେ ଭୂମିଷ୍ଠ
ହୋଇ ଭରିଥିଲେ ଖୁସି ।
ପାଠପଢା ସାରି ଓକିଲାତି କରି
ଲଢ଼ିଥିଲେ ଦେଶ ପାଇଁ,
ଗାନ୍ଧୀଙ୍କ ଆହ୍ୱାନେ ଜାତୀୟ କଂଗ୍ରେସେ
କାର୍ଯ୍ୟ କଲେ ଯୋଗଦେଇ ।
ଆର୍ଯ୍ୟ ସମାଜରୁ ପ୍ରଥମ ପ୍ରେରଣା
ପାଇ ବ୍ରତୀ ଦେଶପାଇଁ,
ଇଂରେଜ ଶାସନ ବିରୁଦ୍ଧରେ ସ୍ୱର
ତୋଳିଲେ ବିପ୍ଲବୀ ହୋଇ ।
ଲାଲ, ବାଲ, ପାଲ ତ୍ରିରତ୍ନ ଭାରତେ
ଏକମନ ଏକପ୍ରାଣେ,
ଇଂରେଜ ବିରୁଦ୍ଧେ ଚରମ ପଥରେ
ଗର୍ଜିଥିଲେ ଘନ ଘନେ ।
ଅସହଯୋଗରେ ମିଶିଥିଲେ ସିଏ
ଗାନ୍ଧିଜୀଙ୍କ ଆହ୍ୱାନରେ,
ସ୍ବଦେଶୀ ଜିନିଷ ବ୍ୟବହାର ପାଇଁ
ସଦା ପ୍ରବର୍ତ୍ତାଉଥିଲେ ।
ଇଂରେଜ ଚକ୍ରାନ୍ତେ ଆସିଲା ଭାରତେ
ସାଇମନ କମିଶନ,
ଉଦେଶ୍ୟ ଦମନ କରିବ ଭାରତେ
ସ୍ୱାଧୀନତା ଆନ୍ଦୋଳନ ।
ଖ୍ରୀଷ୍ଟାବ୍ଦ ଉଣେଇଶି ଶହ ଅଠାଇଶୀ
ଅକ୍ଟୋବର ତିରିଶିରେ,
ଜନ ସାଇମନ ପଞ୍ଜାବ ଲାହୋର
ଗଲା ପର୍ଯ୍ୟବେକ୍ଷଣରେ ।
ସେଥିପାଇଁ ଲାଲ ଲାଜପତ ରାୟ
କଲେ ଅହିଂସା ବିକ୍ଷୋଭ,
ବିକ୍ଷୋଭ ଦମନେ କଲେ ଲାଠିମାଡ଼
ସ୍ତବ୍ଧ ଚକିତ ପଞ୍ଜାବ ।
ଲାଠି ପ୍ରହାରରେ ଭୀଷଣ ଆହତ
ହେଲେ ଲାଲ ଲାଜପତ,
ସମସ୍ତ ଚିକିତ୍ସା ବିଫଳ ହୋଇଲା
ବାଛିନେଲେ ସ୍ୱର୍ଗପଥ ।
ଉଣେଇଶି ଶହ ଅଠାଇଶୀ ଅଟେ
ସ୍ଵର୍ଗାରୋହଣର ବର୍ଷ,
ତାରିଖ ଅଟଇ ସେ ପୂଣ୍ୟ ତିଥିର
ନଭେମ୍ବର ସପ୍ତଦଶ ।
ଦେଖି ପାରିଲେନି ଦେଶର ସ୍ୱରାଜ
ପୂର୍ବରୁ ସେ ଚାଲିଗଲେ,
ତାଙ୍କ ତ୍ୟାଗପୂତ କର୍ମ ଇତିହାସେ
ସ୍ବର୍ଣ୍ଣକ୍ଷରେ ଲେଖିଗଲେ ।
