ମନେପଡ଼ ତୁମେ ଫନି
ମନେପଡ଼ ତୁମେ ଫନି
ଗ୍ରୀଷ୍ମ ଆଗମନେ ମନେ ପଡ଼ ଫନି
କି ଦୁର୍ଦ୍ଦାନ୍ତ ତୁମ ରୂପ
ପୁରୀ ଜିଲ୍ଲା ବାସୀ ରକ୍ତ କଣିକାରେ
ଦେଇଗଲ ତୁମେ ଛାପ ।
ଅନୁଭବ ଅନୁଭୂତିର କଥାକୁ
ଭାଷାରେ ବର୍ଣ୍ଣି ନ ହେବ
ଏବେ ବି ଭାବିଲେ ଲୋମ ଟାଙ୍ଗୁରଇ
ବିଭତ୍ସ ଅଟେ ସେ ଦୃଶ୍ୟ |
ମଇ ମାସର ସେ ତିନି ତାରିଖକୁ
କେବେ ଭୁଲି ହେବ ନାହିଁ
ଆକାଶେ ପ୍ରଳୟ ଭୂମିରେ କମ୍ପନ
ଛାତି ଥରି ଉଠୁଥାଇ ।
ବରଷାର ଥାଟ ବାତ୍ୟା ର ସଙ୍କଟ
ଅଥଳ ପବନ ଗତି
ଏ ଆଖି ସାମ୍ନାରେ ଘରଚାଳ ଉଡ଼େ
ଉପୁଡ଼େ ବିଦ୍ୟୁତ୍ ଖୁଣ୍ଟି |
ବୃକ୍ଷରାଜି ସବୁ ଧରାଶାୟୀ ହୋଇ
ଅବରୋଧ କଲେ ରାସ୍ତା
ହେ ଗ୍ରୀଷମ ତୁମ ଉପସ୍ଥିତି ପୁଣି
କରିଦେଲା ସନ୍ତାପିତା ।
ବର୍ଷା ଥମିଗଲା ବାତ୍ୟା ବି ଥମିଲା
ଧନ ଜୀବନର ହାନି
ହେଲେ ଯେ ଜୀବନ ବଂଚି ରହିଥିଲା
ହେଉଥିଲା ହିନିମାନୀ ।
ଗ୍ରୀଷ୍ମ ପ୍ରକୋପ ବି ଅସହ୍ୟ ଥିଲା ଯେ
ବାଳୁତ ରୁ ବୃଦ୍ଧ ତ୍ରସ୍ତ
ମାସ ମାସ ଧରି ବିଦ୍ୟୁତ ନ ଥିଲା
ସର୍ବେ ହେଉଥିଲେ ବ୍ୟସ୍ତ l
ନିଦ ନେଇ ଥିଲା ବନବାସ ପରା
ରାତି ରେ ଘରୁ ବାହାର
ହାତରେ ବିଞ୍ଚଣା ଘୁରୁଥିଲା ସିନା
ଖୋଲା ସଭିଙ୍କ ଦୁଆର ।
ଗ୍ରୀଷ୍ମ ଆଗମନେ ମନେପଡ଼ ଫନି
ଦେହେ ମନେ ଉଠେ ଶଙ୍କା
ମନେ ପଡ଼ିଯାଏ ଛାତି ଥରା ଶବ୍ଦ
ଆକାଶ ବି ଅଙ୍କାବଙ୍କା |