ଅଧୁରା ସ୍ୱପ୍ନ

କାହାରି ଜୀବନ ନୁହେଁ ଚିରସ୍ଥାୟୀ

ଧନୀ ହେଉ ବା ଗରିବ

ଅଭିନୟ ଶେଷେ ଅଫେରା ରାଇଜେ

ଦିନେ ତ ଯିବାକୁ ହେବ ।

ଅଧା ରହିଯିବ ଯେତେ ସବୁ ସ୍ବପ୍ନ

ଅଧା ରହିଯିବ ଆଶା

ପକ୍ଷୀ ଉଡିଯିବ ସବୁ ଦିନ ପାଇଁ

ଖାଲି ପଡ଼ିଥିବ ବସା ।

ଦଶ ବାର ଦିନ ପକାଇଣ ମନ

ଝୁରିବେ ଆପଣା ଜନେ

କିଛି ଦିନ ପରେ ଭୁଲିଯିବେ ସବୁ

କେହି ରଖିବେନି ମନେ ।

ଜନମ, ମରଣ ଏଇ ତ ଜୀବନ

ଛାଇ ଆଲୁଅ ର ଖେଳ

ଅଳପ ଦିନର ଗଳପ ସରିଲେ

ଡାକିନେବ ଦିନେ କାଳ ।

ତଥାପି ବୁଝେନା ଏ ଅବୁଝା ମନ

କ୍ଷଣିକ ସୁଖରେ ଅନ୍ଧ

ଗଲା ବେଳେ ସାଥେ କିଛି ବି ନେବାନି

ବୋହି ନେବେ ଚାରି କାନ୍ଧ ।

ଜୁଇର ଖଟରେ ଏଇ ଶରୀରଟା 

ହୋଇଯିବ ଦିନେ ଲୀନ

ମାଟିର ଘଟ ଏ ମାଟିରେ ମିଶିବ

ରହିବନି କିଛି ଚିହ୍ନ ।