ଯାଉଛ ତ ଚାଲିଯାଅ.....😣

 ତୁମେ ଯେବେ ଆସିଥିଲ, ନୂଆ ନୂଆ ଲାଗୁଥିଲ,
କେତେ ଯତ୍ନେ ଜିଣିନେଲ ମନ .....
 ତୁମେ ଦିନେ ଚାଲିଯିବ, ମୋ ଅଗଣା ଭୁଲିଯିବ —
 କାହିଁ ଭାବି ନଥିଲି ସେଦିନ?

ଯାଉଛ ତ ଚାଲିଯାଅ, ଭୁଲିବ ତ ଭୁଲିଯାଅ,
ଥରେ କୁହ — ଭୁଲିବି କେମିତି….
ବିଗତ ସେ ସବୁ ରାତି, ତୁମ ତିକ୍ତ–ସିକ୍ତ ସ୍ମୃତି,
ଦ୍ୱାଦଶ ମାସର ଅନୁଭୂତି ।

ହରାଇ ଦେଲି ମୁଁ ଯାହା, ପାଇବିନି କେବେ ତାହା, ଭାଗ୍ୟେ ଅଛି ଅନେକ ସଂଘର୍ଷ……
ଜୀବନରେ ଚାଲିଆସି, ଦୁଃଖ ଦେଇଗଲ ବେଶି —
ଯାଅ ତୁମେ, ପୁରାତନ ବର୍ଷ ।

ତୁମେ ଆଜି ଯିବ ଚାଲି, ପ୍ରଭୁ ପାଦେ କରେ ଅଳି — ଫେରି ଆସୁ ସବୁ ଓଠେ ହସ……
ରୋଗ, ଶୋକ ଦୂର କରି, ଖୁସିର ସମ୍ଭାର ଧରି
 ଆସୁ ଏହି ନୂତନ ବରଷ ।

✍️ ପ୍ରଭାସିନୀ ସେନାପତି