ନିଦରେ ନିଦରେ

ତୁମେ କହିଦେଲ ପଦେ ମିଠା କଥା

ମୁଁ କହିଦେଲି ପଦେ

ତୁମ ମୋ ଭିତରେ ମଧୁର ସମ୍ପର୍କ

ସୃଷ୍ଟି ହୋଇଗଲା ବୋଧେ ।

ତୁମେ ପଚାରିଲ ମୋର ଭଲମନ୍ଦ

ମୁଁ ଟିକେ ଦେଲି ପଚାରି

ତୁମ ମୋ ଭିତରେ ପ୍ରେମ ମୁଳଦୁଆ

ଏଇଠୁ ହେଲା ତିଆରି ।

ତାପରେ ଲେଖିଲ ତୁମେ ପ୍ରେମ ଚିଠି

ମୁଁ ବି ଲେଖିଦେଲି ପଦେ

ତୁମ ମୋ ଭିତରେ ପ୍ରେମର ମିନାର

ଗଢ଼ି ହୋଇଗଲା ଅଧେ ।

ତୁମେ ଝୁରି ହେଲ ମୁଁ ଝୁରି ହେଲି

ଦୁହେଁ ହେଉଥିଲେ ଝୁରି

ଚିଠି ଲେଖି ଲେଖି କାଗଜ କଲମ 

 ଦେଉଥିଲେ ଦୁହେଁ ସାରି ।

ତୁମେ ଗାଉଥିଲ ବିରହ ସଙ୍ଗୀତ

ମୁଁ ବି ଗାଇଲି ପଦେ

ଏତିକି ବେଳକୁ ନିଆଁଲଗା ନିଦ

ଭାଙ୍ଗିଗଲା ରାତି ଅଧେ ।