💮ମାଆ ବୀଣାପାଣି💮

ଜ୍ଞାନର ଆଲୋକ ବୁଣିଦିଅ ମା' ଗୋ
ଅଜ୍ଞାନତା ଦୂର କରି,
ସ୍ଥିତପ୍ରଜ୍ଞ ହେଉ ଭ୍ରମିତ ହୃଦୟ
ସତ୍ୟ ପଥ ଅନୁସରି । ​

ନିରତେ ନିର୍ମଳ ନିର୍ଝରିଣୀ ସମ
ନିଗାଡ଼ି କରୁଣା ବାରି,
ପ୍ରତି ପ୍ରାଣାଙ୍ଗନେ ପ୍ରଜ୍ଞାର ପ୍ରଦୀପ
ପ୍ରଜ୍ବଳନ ଦିଅ କରି । ​

ଭବ୍ୟ ଭାବନାରେ ଭରିଦିଅ ମନେ
ଭକ୍ତିର ପୀୟୂଷ ଧାରା,
ସତଚିନ୍ତା, ସତକର୍ମ, ସତ୍ୟ ବିଚାରରେ
 ହସୁ ଏ ସଂସାର ସାରା । ​

ତୁଚ୍ଛ ତାମସିକ ଅହଂ ତୁଟିଯାଉ
ତୁଟୁ ଦୁରିତ କଷଣ,
କରୁଣା କିରଣେ କଳୁଷ ବିନାଶି
କର ମା' ଜଗ କଲ୍ୟାଣ । ​
— ପ୍ରଭାସିନୀ ସେନାପତି