କଳିଯୁଗ ଇତି କଥା

ମହାଭାରତରେ କୁରୁକ୍ଷେତ୍ର ରଣେ

  ଶ୍ରୀକୃଷ୍ଣଙ୍କ ଜ୍ଞାନ ବାଣୀ ।

ଅଜ୍ଞାନ ଅନ୍ଧାର ଦୂର କରିଥିଲା

  ଜ୍ଞାନର ବୀଜକୁ ବୁଣି ।୧।

  

ହିନ୍ଦୁ ଧର୍ମ ଗ୍ରନ୍ଥ ଗୀତାର ସାରାଂଶ

   କୃଷ୍ଣଙ୍କ ମୁଖରୁ ଶୁଣି ।

ଧର୍ମ ଯୁଦ୍ଧ ପାଇଁ ଗାଣ୍ଡିବ ଧରିଲେ

  କୁନ୍ତୀଙ୍କ ପୁତ୍ର ଫାଲ୍ଗୁନି ।୨।

  

କୌରବଙ୍କ ପାପ କରିବାକୁ ନାଶ

   କୃଷ୍ଣଙ୍କର ଗୀତା ଜ୍ଞାନ ।

କୁରୁକ୍ଷେତ୍ର ରଣେ ସହାୟକ ହୋଇ

  ରକ୍ଷା ହେଲା ଧର୍ମ ମାନ ।୩।

  

କଳି  ଭବିଷ୍ୟତ କୃଷ୍ଣଙ୍କର ବାଣୀ

   ଗୀତା ଭାଗବତ କଥା ।

ଦ୍ୱାପରର ବାଣୀ କଳିରେ କାହାଣୀ

  ଭାବୁଥିଲେ ସର୍ବେ ମିଥ୍ୟା ।୪।

  

କାହାଣୀର ବାଣୀ ସତ୍ୟ ହୁଏ ଜାଣି

   ଘାରିଲାଣି ଏବେ ଚିନ୍ତା ।

ପର୍ଯ୍ୟାୟ କ୍ରମରେ ଘଟଣା ଚକ୍ରରେ

  ବୃଦ୍ଧି ହୁଏ ମୁଣ୍ଡ ବ୍ୟଥା ।୫।

   

ନାଟକ ଢଙ୍ଗରେ ଧରଣୀ ବକ୍ଷରେ

   ବାସ୍ତବ ରୂପରେ ଆସି ।

ଜନ ଜଗତରେ ତାଣ୍ଡବ କଲାଣି

  ଚକିତ ଜନତା ଦେଖି ।୬।

  

ପଚାଶ ଶତକ ବରଷ ପୂର୍ବର 

  ଭାଗବତ ଗୀତା ବାଣୀ ।

ବର୍ଣ୍ଣି ଥିଲେ କୃଷ୍ଣ କଳିର କାହାଣୀ

  ଜାଣିଛନ୍ତି ଜ୍ଞାନୀ ଗୁଣୀ ।୭।

   

କଳିଯୁଗେ ଧର୍ମ କର୍ମ ନଷ୍ଟ ହୋଇ

   ଅସତ୍ୟ ରାଜ କରିବ ।

ବଞ୍ଚିବାର କାଳ ଶାରୀରିକ ବଳ

  ସ୍ମୃତି ଶକ୍ତି ହ୍ରାସ ହେବ ।୮।

  

ମାନବର ମୂଲ୍ୟ ସମ୍ପତ୍ତିର ତୁଲ୍ୟ

  ତରାଜୁରେ ହେବ ମାପ ।

କଳ ବଳ ନେଇ ଆଇନି କାନୁନ 

  ଶକ୍ତି ସପକ୍ଷରେ ଯିବ ।୯।

  

ବାହ୍ୟ ଆକର୍ଷଣେ ହୋଇବ ମିଳନ

   ପୁରୁଷ ନାରୀଙ୍କ ମତି ।

ସମ୍ପତି ଲୋଭରେ ଆଶକ୍ତି ମୋହରେ

  ବଢ଼ି ପରକିଆ ପ୍ରୀତି ।୧୦।

   

ନାରୀ ପୁରୁଷଙ୍କ ମୂଲ୍ୟାଙ୍କନ ହେବ

   ଲିଙ୍ଗ ଅଧାରକୁ ନେଇ ।

ସମ୍ଭୋଗ ଲୋଭରେ କଳି ଉପୁଜିବ

  ବିଚ୍ଛେଦ ଘଟିବ ତହିଁ ।୧୧।

  

ସଫଳତା ପାଇଁ ଚୋରି ବେଇମାନି 

  ବେପାରରେ ଧୋକାବାଜ ।

ସମ୍ପର୍କର ବନ୍ଧ ସହଜେ ଭାଙ୍ଗିବ

 ରଣେ ହୋଇ ସଜବାଜ ।୧୨।

  

ପୂଜା ପାଠ ମନ୍ତ୍ର ଶାସ୍ତ୍ର ଜ୍ଞାନହୀନ

  ବିଜ୍ଞାନୀ ବୋଲି କହିବେ ।

ପବିତ୍ର ସୁତାକୁ କାନ୍ଧରେ ଗୁଡେଇ

 ବ୍ରହ୍ମଚାରୀ ବୋଲାଇବେ ।୧୩।

 

ଶବ୍ଦ ବାଣ ମାରି ବାକ୍ୟାଳପ କରି

  ବିଦ୍ୱାନରେ ହେବେ ଗଣା ।

ବିଜ୍ଞାନୀ ପଣ୍ଡିତେ ହୋଇବେ ଦଣ୍ଡିତ

 ଲୋକେ ହେବେ ବାଟବଣା ।୧୪।

 

ଗାଆଁ ଗାଡ଼ିଆକୁ ପବିତ୍ର କହିବେ

  ଗଙ୍ଗାର ମାନ୍ୟତା ଦେବେ ।

ପବିତ୍ର ଗଙ୍ଗାରେ ମଇଳା ଭରିବ

 ଦୂଷିତ ବୋଲି କହିବେ ।୧୫।

  

ପେଟ ପାଇଁ ନାଟ ଏକମାତ୍ର ଲକ୍ଷ୍ୟ

   ପରିବାର ପୋଷଣରେ ।

ରୋଜଗାର କ୍ଷମ ପୁରୁଷ ନାରୀଙ୍କୁ

 ପ୍ରାଧାନ୍ୟ ଦେବ ସଂସାର ।୧୬।

  

ଗରୀବଙ୍କୁ ସର୍ବେ ଘୃଣାରେ ଦେଖିବେ

    ଅପବିତ୍ର ବୋଲି କହି ।

ଭିକ୍ଷା ଦେବେନାହିଁ ଥାଳ ଭାଙ୍ଗି ଦେବେ

  ସାହା ହେବେନାହିଁ କେହି ।୧୭।

  

ଭ୍ରଷ୍ଟାଚାରୀ ହୋଇ ଚୋରି ନାରୀ କରି

   ଶକ୍ତିଶାଳୀ ବୋଲାଇବେ ।

ଗୁଣ୍ଡା ବଦମାସ  ସମ୍ପତି ବଳରେ

  ରାଜନେତା ହେଉଥିବେ ।୧୮।

  

ଶାସନ  ଗାଦିକୁ  ଅକ୍ତିଆର  କରି

  ଶୋଷଣ ଚାରା ରୋଇବେ ।

ଦୁର୍ନୀତି ଜଙ୍ଗଲ ମାଡିବ ପ୍ରବଳ

 ଫଳ ଭାଗ ବାଣ୍ଟି ନେବେ ।୧୯।

  

କର ଦେଇ ଜନେ ହାରାସ ହୋଇବେ

    ଗରିବୀ ବୃଦ୍ଧି ପାଇବ ।

ଖାଦ୍ୟ ଅଭାବରେ ଅଖାଦ୍ୟ ଭକ୍ଷଣେ

 ଶରୀର ରୋଗୀଣା ହେବ ।୨୦।

  

ଜ୍ଞାନ ବିଜ୍ଞାନର ଅପପ୍ରୟୋଗରେ

  ପରିବେଶ ହେବ ହାନି ।

ପ୍ରକୃତି ବିପକ୍ଷେ ସଂଗ୍ରାମ କରିବେ

  ନିଜକୁ ବୋଲାଇ ଜ୍ଞାନୀ ।୨୧।

  

ପରିବେଶ ନଷ୍ଟ ଦେବ ବହୁ କଷ୍ଟ

    ପ୍ରଦୂଷଣ ବୃଦ୍ଧି ହୋଇ ।

ପ୍ରକୃତି କୋପରେ ଦୈବୀ ଦୁର୍ବିପାକ

   ଭୟଙ୍କର ରୂପ ନେଇ ।୨୨।

   

କୃଷି ବିଗିଡିବ ମରୁଡ଼ିର ହୋଇବ

   ଖାଦ୍ୟର ଅଭାବ ହେବ ।

ଜଳ ବିନା ଲୋକେ ବିକଳ ହୋଇବେ

   ଶୋଷରେ ତଣ୍ଟି ଶୁଖିବ ।୨୩।

    

ରୋଗ ଶୋକ ଦୁଖଃ ବଢିବ କ୍ରମଶଃ

    ଔଷଧ ମିଳିବ ନାହିଁ ।

ବଞ୍ଚିବା ବୟସ ହ୍ରାସ ହୋଇଯିବ

   ବିଲୟ ସୂଚନା ଏହି ।୨୪।

    

ନିଶା ବେପାରରେ ଅର୍ଥ ରୋଜଗାର

   ରାଜକୋଷ ପାଇଁ ଲାଭ ।

ପେଟ ବିକଳରେ କଳି ଝଗଡାରେ

  ହତ୍ୟା ରାହଜନୀ ହେବ ।୨୫।

   

ସମାଜେ ବିଧର୍ମୀ ଭଣ୍ଡ ବାବା ହୋଇ

   ବସିବେ ବଡ଼ ଆସନେ ।

ଭଣ୍ଡ ବାବାଙ୍କର ଭାଣ୍ଡ ଭାଷଣରେ

  ଆକର୍ଷିତ ହେବେ ଜନେ ।୨୬।

  

ସେବା ଦାନ ଦେଇ ବୁଢା ହୋଇଗଲେ

    ସେବକ ପଡିବ ବଳୀ ।

ଚାକିରିରୁ ତାକୁ ବିଦା କରି ଦେବେ

  ଦେଇ ଖାଲି ମାଡ଼ ଗାଳି ।୨୭।

   

ଦୁଧିଆଳି ଗାଈ କ୍ଷୀର ଶୁଖି ଗଲେ

  କଂସେଇକୁ ଦେବେ ବିକି ।

କଂସେଇ ଚୋଟରେ ଗୋମାତା ମରିବ

  କଳିଯୁଗ ରୀତିନୀତି ।୨୮।

   

ଜନସଂଖ୍ୟା ବୃଦ୍ଧି ବେକାରୀ ସମସ୍ୟା

   ଜଟିଳ ହୋଇବ ଭାରି ।

ଚାକିରୀ ନ ପାଇ ଜୀବିକା ହରେଇ

  ବୃଦ୍ଧି ହେବ ଚୋରି ନାରୀ ।୨୯।

  

ଭ୍ରୁଣ ହତ୍ୟା ପାପ ହୋଇବ ଅସଂଖ୍ୟ

   କୁମାରୀ ହୋଇବେ ମାଆ ।

ବଦନାମ ହୋଇ ଗଣିକା ସାଜିବେ

  ଖୋଜିବେ ବଂଚିବା ରାହା ।୩୦।

   

ଚୋର ହେବ ରାଜା ସାଧୁ ହେବେ ପ୍ରଜା

    ସମ୍ପତି କରିବେ ଚୋରି ।

ବିଳାସ ବ୍ୟସନେ ଭୋଗ ଲାଳସାରେ

   ଅୟସ କରିବେ ଭାରି ।୩୧।

    

ଜନତା ସୁରକ୍ଷା ହୋଇ ଅବ୍ୟବସ୍ଥା

   ଅସଫଳ ହେବେ ରାଜା ।

ରୋଗ ଭୋକ ଭୟେ ମରିବେ ଜନତା

  କବର ହୋଇବ ଖୋଜା ।୩୨।

   

ଜନମ ହୋଇଲେ ମୃତ୍ୟୁ ଭୟ ଅଛି

   ଧୃବ ସତ୍ୟ ଅଟେ ଯାହା ।

ସେହି ସତ୍ୟ ଦିନେ ବିଶ୍ୱକୁ ଘାରିବ

  ଗୀତାରେ ଲିଖିତ ତାହା ।୩୩।

   

ତିନି ପର୍ଯ୍ୟାୟରେ ପ୍ରଳୟ ଆସିବ

   ସମୟ କ୍ରମାନ୍ଵୟରେ ।

ନୈତିକତା ନାଶ ପହିଲି ସୋପାନ

  ଅତିକ୍ରାନ୍ତ ପ୍ରଥମରେ ।୩୪।

   

ଦ୍ବିତୀୟେ ଚାଲିଛି ପ୍ରକୃତି ତାଣ୍ଡବ

   ତୃତୀୟରେ ଅତ୍ୟାନ୍ତିକ ।

ପ୍ରକୃତି ତାଣ୍ଡବ ସରି ଆସିଲାଣି

  ଅତ୍ୟାନ୍ତିକ ଭୟାନକ ।୩୫।

   

ସୂର୍ଯ୍ୟ ତେଜ ରଶ୍ମି ସାଗର ଶୋଷିବ

   ମରୁଡି ଆସିବ ମାଡି ।

ସମୁଦ୍ର ଗର୍ଭରେ ବିସ୍ଫୋରଣ ହେବ

  ବିଶ୍ୱ ଯିବ ବଳି ପଡି ।୩୬।

   

ପାତାଳ ଗହ୍ବରେ ଜଳିଯିବ ସବୁ

   ଜୀବଜଗତର ନାଶ ।

ବିଶ୍ୱର ଗଠନ ପରିବର୍ତ୍ତନରେ

  ହୋଇଯିବ ସବୁ ଧ୍ୱଂସ ।୩୭।

  

ନୂତନ ଯୁଗର ଆରମ୍ଭ ହୋଇବ

  ନାମ ତାର ସତ୍ୟଯୁଗ ।

ସୃଷ୍ଟିର ସଂଚାର ପୁନର୍ବାର ହେବ

  ବୃକ୍ଷଲତା ସଙ୍ଗେ ଜୀଵ ।୩୮।

   

ଆରମ୍ଭ ଯେଉଁଠି ଶେଷ ବି ସେଇଠି

   ସୃଷ୍ଟିର ନିୟମ ଏହି ।

ସୃଷ୍ଟି କାର୍ତ୍ତାଙ୍କର ସୃଷ୍ଟି ନିୟମକୁ

 ଭାଙ୍ଗି ପାରିବେନି କେହି ।୩୯।

  

ସ୍ୱଳ୍ପ ଜ୍ଞାନ ମୋର କରିବେ ବିଚାର  

   ଧରିବେନି କେହି ଦୋଷ ।

ଭୁଲ ହୋଇଥିଲେ କ୍ଷମା କରିଦେବେ

  କରିବେନି ଜମା ରୋଷ ।୪୦।