ନାରୀର ଅଜସ୍ର ସପନ
ନାରୀର ଅଜସ୍ର ସପନ
ଗୋଟିଏ ଭଲ ଝିଅ, ଭଲ ସ୍ତ୍ରୀ, ଭଲ ବୋହୂ,
ଭଲ ଭଉଣୀ ଓ ଭଲ ମାଆ,
ନାରୀ ସଦା ଚେଷ୍ଟିତ କିପରି ତୁଲାଇ ସେ
ସରବ ଦାୟିତ୍ୱ, ହୋଇବ ଠିଆ |୧|
ଚେଷ୍ଟିତ ଆପଣାପଣର ମିଠା ଆବେଶରେ
ସରବଙ୍କୁ ସେ କିପରି ବାନ୍ଧିବ
ହୃଦୟର ମଧୁ ବାଣ୍ଟି ଗୋଟିଏ ମଧୁର ବ୍ୟକ୍ତିତ୍ୱ
ହିସାବରେ ସିଏ ଉଭା ହେବ |୨|
ମନେ ଥାଏ ନାରୀଟିଏର ଅସୁମାରୀ ପ୍ରୟାସ
ମଧୁମୟ ଦୁନିଆଁକୁ ନିଠେଇ ଦେଖିବାକୁ
ସକାରତ୍ମକତାର ମନ୍ତ୍ରରେ ବାସ୍ନାୟିତ କରିବାକୁ
ଚାହେଁ ସଭିଙ୍କର ହୃଦୟକୁ |୩|
ଦୁନିଆ ଦାଣ୍ଡରେ ଭର୍ତ୍ତି ହୋଇ ରହି ଥାଏ ତାର
ଆଖିରେ ମନରେ ଅଜସ୍ର ସପନ
ତା କଳାତ୍ମକତା ସକାରତ୍ମକତାକୁ ନଷ୍ଟ କରି
ଦିଏ ପୁରୁଷର ପ୍ରଦୂଷିତ ମନ |୪|
ପୁରୁଷ ପ୍ରାଧାନ୍ୟ ଅଭିମାନ ସମ ପାଷାଣ
ଜଗତେ ଆଉ କିଛି ମିଳିବ ନାହିଁ
ମାତ୍ରାରେ ଅଳପ ହେଲେ ଚଳି ଯାଇ ହେବ
ଅତି ମାତ୍ରାରେ ସ୍ତ୍ରୀ ସହିବ ନାହିଁ |୫|
ନିଶା କବଳରୁ ମୁକୁଳି ଆସିବା ଚାହିଁଲେ
ନିହାତି ସହଜ କାମ
କିନ୍ତୁ ବହୁ କଷ୍ଟ ସେ ଅଭିମାନ ହାତୁ ମୁକୁଳି,
ପାଳିବା ମାନବ ଧର୍ମ |୬|