ଓଡ଼ିଆ ଜାତିର ଲଢୁଆ ବୀର-19: ପିଣ୍ଡିକ ବାହୁବଳୀନ୍ଦ୍ର

ପାଇକ ବିଦ୍ରୋହ ଆରମ୍ଭ ବେଳରେ ପିଣ୍ଡିକ ବାହୁବଳୀନ୍ଦ୍ର,

ଦେଶପ୍ରେମୀ ଯୋଦ୍ଧା ନିଜ ବାହୁବଳେ ଗଢିଲେ ବିଦ୍ରୋହୀ କେନ୍ଦ୍ର ।

ଧନୁ-ତୀର ଛୁରୀ ଖଣ୍ଡା ତରବାରୀ ସମର କୌଶଳେ ବୀର,

ବିଶାଳ ବପୁର ବାହୁବଳ ଦେଖି ପୁଲିସକୁ ଲାଗେ ଡର ।

ବିଦେଶୀ ଶାସକ ସାଜିଲେ ଶୋଷକ ବଙ୍ଗବାସୀ କର୍ମଚାରୀ,

ଫିରିଙ୍ଗି ବଳରେ ସବୁସୁଖ ନେଇ ହୋଇଥିଲେ ଅତ୍ୟାଚାରୀ ।

ବିଦ୍ରୋହୀ ସାଜିଲେ ଦଳେଇ ପିଣ୍ଡିକ ଗଢିଲେ ପାଇକ ସେନା,

କର୍ମଚାରୀ ମାରି ଆତଙ୍କିତ କରି ଲୁଟିଲେ ଖଜଣା ଖାନା ।

ଖୋରଧା ରାଇଜେ ପୁଲିସ ଶାସନ ଚାଲିଲା ଦମନ ଲୀଳା,

କିଏ ସେ ପାଇଲା ଫାଶୀଦଣ୍ଡ ପୁଣି କିଏ କଳାପାଣି ଗଲା ।

ପିଣ୍ଡିକ ବୀରକୁ ଧରିଦେବା ପାଇଁ ଯାଚିଲେ କମ୍ପାନୀ ଟଙ୍କା,

ପୁରସ୍କାର ଲୋଭେ ବିଶ୍ଵାସ ଘାତକ ମୁହଁ କରିଦେଲେ ବଙ୍କା ।

ନିଜ ବୁଦ୍ଧିବଳେ ପୁଲିସ ଆଖିରେ ଧୂଳିଦେଇ ବାରବାର,

ଖସି ଯାଉଥିଲେ ଅସ୍ତ୍ରଶସ୍ତ୍ର ଧରି ବିଦ୍ରୋହୀ ପିଣ୍ଡିକ ବୀର ।

ହାତେଥିଲା କଡ଼ି ଅଣ୍ଟାରେ ଦଉଡ଼ି କରୁଥିଲେ ପଳାୟନ,

କାଠଯୋଡ଼ି ନଦୀ ପାରି ହେବାବେଳେ ଗୁଳି ହୋଇଲା ବର୍ଷଣ ।

ନକରି ଖାତର ଧାଉଁଥିଲେ ବୀର ଘେରିଗଲେ ଅସ୍ତ୍ରଧାରୀ,

ଅସଂଖ୍ୟ ଗୁଳିରେ ଟଳିଲେ ପିଣ୍ଡିକ ବୀର ଅଭିମନ୍ୟୁ ପରି ।

ସ୍ୱାଭିମାନୀ ବୀର ବାହୁବଳୀନ୍ଦ୍ର ସେ ନାମକୁ ସାର୍ଥକ କଲେ,

ବକସି ଜଗବନ୍ଧୁ ସର୍ଦ୍ଦାର ହରାଇ ମର୍ମାହତ ହୋଇଥିଲେ ।