ରକ୍ଷା ବନ୍ଧନ

ଭାବର ଡୋରୀରେ ବାନ୍ଧିଲି ବନ୍ଧନ 

ରଖିବାକୁ ମାନ ଦେଲି ମୋ' ରାଣ ,

ସେନେହ ଶରଧା, ଆନନ୍ଦରେ ସିକ୍ତା

ରେଶମ ଡୋରୀରେ ହୋଇଛି ଯେ ବନ୍ଧା,

ଶ୍ରୀ ବଳଦେବଙ୍କ ଜନ୍ମ ଅବସରେ

ଶ୍ରାବଣ ପୁନେଇଁ , ପୁଣ୍ଯ ଏ ତିଥିରେ

ପ୍ରତିଟି ଓଡ଼ିଆ ଘରେ ଘରେ ପାଳେ

ରକ୍ଷାର ସୂତ୍ରରେ ସେନେହ ପଖାଳେ ,

କୃଷ୍ଣା ବାନ୍ଧିଥିଲେ , କୃଷ୍ଣଙ୍କ ହାତରେ

ରେଶମ ସୂତାର ବସ୍ତ୍ର, ଦ୍ବାପରରେ ,

କରିଥିଲେ ପଣ ରଖିବାକୁ ମାନ 

କୋଟି ବସ୍ତ୍ର ଦେଇ ରଖିଲେ ସମ୍ମାନ ,

ସାଧବର ପୁଏ ଯାଉଥିଲେ ଦୂରେ

ବଣିଜ କରି ଯେ ଦେଶ-ବିଦେଶରେ ,

ସାଧବଝିଅଟି ମଙ୍ଗଳା ମନ୍ଦିରେ

ବାନ୍ଧୁଥିଲା ଡୋରୀ ଅତି ଯତନରେ ,

ଭାଇମାନଙ୍କର ଶୁଭ ସେ ମନାସି

ଯଶ-ଆୟୁ ବୃଦ୍ଧି ହୃଦୟରେ ଚିନ୍ତି ,

ବାନ୍ଧି ଦେଉଥିଲା ରକ୍ଷା ସୂତ୍ରଟିଏ

କୋଟି ଜନମର ସ୍ନେହ ସୂତ୍ରଟିଏ ,

ସୁଭଦ୍ରା ବାନ୍ଧନ୍ତି ଦୁଇ ଭାଇଙ୍କ ହାତରେ

ମଙ୍ଗଳ ବିଧାନ ମଙ୍ଗଳ ବେଳାରେ ,

ଜଗାବଳିଆଙ୍କ ସୁମନାସ ଚିନ୍ତି 

ସେନେହ ସୂତ୍ରରେ ବାନ୍ଧିଥା'ନ୍ତି ରାକ୍ଷୀ ,

ରାକ୍ଷୀ ନୁହେଁ ଏକ ରେଶମର ଡୋର 

ସେନେହ ସୌହାର୍ଦ୍ଦ୍ୟେ ଗୁନ୍ଥା ଏ ଶୃଙ୍ଗାର ,

ବାନ୍ଧିଦେଲି ହାତେ ରକ୍ଷାର ବନ୍ଧନ 

ଯଶ-ଆୟୁ ବୃଦ୍ଧି କାରକ କାରଣ ,

ଶଙ୍ଖରେ ପୂରେଇ ଚକ୍ର ଆଢୁଆଳେ

ରଖିଥା'ନ୍ତୁ ଜଗା ଏହି ନିବେଦନ ।