ଜୀବନ ସଂଗ୍ରାମ

ମେଲାଇଛି କାୟା ଶୂନ୍ୟ ପବନରେ

ଅଦ୍ଭୁତ ସେ ଅଣୁଜୀବ

ଗିଳି ପକାଉଛି କଳ କାରଖାନା

ଧନୀ ହେଉ କିବା ଗରିବ ।

ରାସ୍ତା ଘାଟ ହୁଏ ନିରବ ନିସ୍ତବ୍ଧ

ବନ୍ଦ ଗମନାଗମନ

ଗୀର୍ଜା ମସଜିଦ ଦେବ ମନ୍ଦିରରେ

ଭକ୍ତ ପ୍ରବେଶ ବାରଣ ।

ହାଟ ଓ ବଜାର ବେପାର ବଣିଜ

ଦପ୍ତର ଡାକ୍ତରଖାନା

ସବୁଠାରେ ଭୟ ଆତଙ୍କର ଛାୟା

ଲୋକ ଯାତାୟତ ମନା ।

ପାଳୁଛନ୍ତି ଗୃହେ ମାର୍ଗ ଦର୍ଶନକୁ

ସ୍ୱଚ୍ଛ ଆଦର୍ଶ ଆଚାର

ମୁହଁକୁ ଘୋଡାଇ ହାତକୁ ସାବୁନେ

ଧୋଉଛନ୍ତି ବାର ବାର ।

ସହରରୁ ଗ୍ରାମ ମହାମାରୀ ରୂପେ

ବ୍ୟାପୁଛି ନବ କୋଭିଡ

ଉଦ୍ଗାରେ ବିଷାଣୁ ଲେଲୀହାନ ଜିହ୍ୱା

କୋକୁଆ ମରଣ ଭୟ ।

କ୍ଷୁଦ୍ର ଅଣୁଜୀବ ଅଦୃଶ୍ୟ ଡ୍ରାଗନ

ବ୍ୟାପକ ମାରକ ଶକ୍ତି

ଲଢ଼ୁଛି ସଂସାର ସଙ୍କଟ ସହିତ

ଅସହାୟ ପରିଣତି ।

ଚାଲୁ ରହିଅଛି ଅବିରତ ଭାବେ

ସଂଗ୍ରାମ ଅନୁସନ୍ଧାନ

ହୋଇ ଉଦ୍ଭାବିତ ଟୀକା ଫଳପ୍ରଦ

ଚାଲୁଛି ଟୀକାକରଣ ।

ସରବ ଜନୀନ ମହାନ ଏ କାର୍ଯ୍ୟ

ଯୁଦ୍ଧ କାଳୀନ ଭିତ୍ତିରେ

ଆଗେଇ ଚାଲିଛି ସମଗ୍ର ଭାରତେ

ସ୍ୱ।ସ୍ଥ୍ୟ କର୍ମୀ ସହଯୋଗେ ।

ସତ୍ୟ ଓ ଅସତ୍ୟ ପାପ ପୂଣ୍ୟ ମଧ୍ୟେ

ସଂଗ୍ରାମ ଏ ଘଡିସନ୍ଧି

ସ୍ୱଚ୍ଛନ୍ଦ ହେଉ ଜୀବନ ଜଗତେ

ପୂଣ୍ୟ ସତ୍ୟ ଲଭୁ ଗତି ।

ସମ୍ମିଳିତ ଆମ ସଫଳ ଉଦ୍ୟମ

ସଚେତନ ସୁକର୍ତ୍ତବ୍ୟ

ସୁରକ୍ଷା କରିବ ମଣିଷ ଜୀବନ

ଭୂତାଣୁ ଅଦୃଶ୍ୟ ମରିବ ।

   ----+---