ଆସିବେ ଭବାନୀ ମାଆ

ମହୁରୀଆ ଭାଇ ମହୁରୀ ବଜା

ଢୋଲିଆ ଭାଇତୁ ଢୋଲିକି ବଜା

ମଣ୍ଡପ ହେଲାଣି ସଜା,

ଜଗତଜନନୀ ମରତ ଆସିବେ

ବଜାରେ ବାଇଦ ବଜା ।

ଅଶିଣ ଆକାଶ ସଫା ସୁତର

ଝରା ଶେଫାଳୀର ବାସେ ଅତର

ଆକାଶ ଦିଶଇ ତୋଫା,

ମେଘ ଘଡ଼ଘଡ଼ି ଶୁଭୁ ନାହିଁ ଆଉ

ନାହିଁ ବରଷାର ଟୋପା ।

ଶ୍ୟାମଳ କେଦାର ଫୁଲ ଉଡାଇ

ତରୁ ଦେହେ କେତେ ଲତା ଗୁଡେଇ

ହସିଲେଣି ଜୁଇ ଯାଇ,

ସଂଜ ଆକାଶରେ ବିହଗ ଫେରଇ

ମାଆଙ୍କ ବନ୍ଦନା ଗାଇ ।

ଧୂପ,ଦୀପ,ଝୁଣା, ଚନ୍ଦନ ଘୋରି

ନାନା ବିଧ ଫୁଲ,ଶ୍ରୀଫଳ ଧରି

ଆବାହନ କରେ ଦ୍ଵିଜ,

ଧରା ଧାମେ ମାଆ ବିଜେ କର ଆସି

ଉଚ୍ଚାରଇ ମନ୍ତ୍ର ବୀଜ ।

ନଈ ପଠା କଡେ କାଶର ଫୁଲେ

ରହିରହି ଆସି ପବନ ଝୁଲେ

ନଈର ଚହଲା ତରଙ୍ଗ ଜଳେ,

ପର ଝାଡ଼ି ଦେଖ ନୃତ୍ୟ କରିଲେଣି

ଧୋବ ଫରଫର ମରାଳ ଦଳେ ।

ଆସ ନରନାରୀ ପ୍ରଭାତୁ ଉଠି

ଅଗଣାରେ ବସି ଆଙ୍କିବା ଝୋଟି

ଜଗତକୁ ହେବେ ସାହା,

ବନ୍ଦାପନା କରି ପାଛୋଟି ଆଣିବା

ଆସିବେ ଭବାନୀ ମାଆ ।