ଆସ ଖେଳିବା ହୋଲି

ଆସ ଆସ ସାଙ୍ଗ ଖେଳିବା ହୋଲି

ଜାତି ଧରମର ଫରକ ଭୁଲି

ରଙ୍ଗବେରଙ୍ଗର ପ୍ରୀତି ଅବିରକୁ

ଗାଲରେ ଗାଲରେ ହୋଇବା ବୋଳି ।।

ଗୀତ ଗାଇଗାଇ ବାଜା ବଜେଇ

ରାଧାକୃଷ୍ଣ ଲୀଳା ମନେ ପକାଇ

ରଙ୍ଗ ପିଚକାରୀ ନାଲି ରଙ୍ଗ ଭରି

ଦେହ ଆଉ ମନ ଦେବା ଭିଜେଇ ।।

କଷି ଆମ୍ବ ପଣା ପିଇବା ବସି

ପିଲାଠାରୁ ବୁଢ଼ା ସଭିଏଁ ମିଶି

ସାହି ପଡ଼ିଶାରେ ମିଠେଇ ବାଣ୍ଟିବା

ତା ସାଥିରେ ଟିକେ ବାଣ୍ଟିବା ଖୁସି ।। 

ଆଖିରେ ଚଷମା ମୁଣ୍ଡରେ ଟୋପି

ସୁରକ୍ଷା ମନ୍ତର ମନରେ ଜପି

ହିତକାରୀ ରଙ୍ଗ ଖେଳିବା ସଙ୍ଗାତେ

ଛୁଇଁବାନି ଆନ ରଙ୍ଗ କଦାପି ।।

ଆସ ଆସ ସାଙ୍ଗ ଖେଳିବା ହୋଲି

ସେନେହ କରିବା ହୃଦୟ ଖୋଲି

ମୋହନ ମୁରାରୀ ଶରଣ ପଶିବା

ମଥାରେ ମାରିବା ଚରଣ ଧୂଳି ।।