ସ୍ୱାଧୀନ ଭାରତ

ଜାତି ଧରମର ଭେଦ ଭାବ ଭୁଲି

ଏକତା ମନ୍ତର ବଳେ,

ଆସ ଭାଇ ବନ୍ଧୁ ଜନ ଗଣ ମନ 

ଗାଇବା ତ୍ରିରଙ୍ଗା ତଳେ 

ନାହିଁ ଆମ ଡର ଭୟ

ସ୍ୱାଧୀନ ଭାରତ ନାଗରିକ ଆମେ

ଏତିକି ହିଁ ପରିଚୟ ।

ବିଦେଶୀ ଶାସନୁ ପାଇଛୁ ମୁକତି

ଆମ ଦେଶେ ଆମେ ରାଜା,

ନୀଳ ଆକାଶରେ ଫରଫର ହୋଇ

ଉଡୁଛି ଜାତୀୟ ଧ୍ଵଜା 

କହି ଯାଏ କାନେ କାନେ

ମହାପୁରୁଷଙ୍କ ବଳିଦାନ କଥା

ରଖିଥିବା ସଦା ମନେ ।

ସୁଭାଷ ତିଳକ ଗାନ୍ଧୀ ଗୋପବନ୍ଧୁ

ଦେଇଗଲେ ମହା ଜ୍ଞାନ

ମାଟି ମାଆ ପାଖେ ତୁଚ୍ଛ ଧନ ରତ୍ନ

ତୁଚ୍

Advertisement

ଛ ଜୀବ ଯଉବନ 

କେଡେ ସେ ଦାରୁଣ ଗାଥା !

ବିଦେଶୀ ହାତରୁ ଗୁଳି କେ ଖାଇଲା

କଟିଲା କାହାରି ମଥା ।

ଡରିଲାନି ହେଲେ ଭାରତୀୟ ଜାତି

ଥରିଲା ଫିରିଙ୍ଗି ଛାତି,

ଭାରତ ମାଆକୁ ଦୁଇ ଭାଗ କରି

ଛାଡ଼ିଗଲେ ରାତାରାତି 

ବଦଳିଲା ସୀମାରେଖା

ହିମାଳୟ ଠାରୁ କୁମାରିକା ଯାଏଁ

ନୂତନ ଭାରତ ଲେଖା ।

ଚିର କାଳପାଇଁ ସାଇତି ରଖିବା

ଆମେ ସ୍ଵାଧୀନତା ଆମ,

କଳା କୀରତିରେ ଜ୍ଞାନ କୌଶଳରେ

ରଖିବା ଦେଶର ନାମ

ପ୍ରଗତିରେ ଆମ ଲୟ

ଆନନ୍ଦ ମନରେ ସଭିଏଁ କହିବା

ଜୟ ଭାରତର ଜୟ ।