ଆ ବର୍ଷା ଆ..

ଆଷାଢ଼ ବାହୁଡ଼ି ଶ୍ରାବଣ ଆସିବ

ଝୁମିଯିବ ଧରାଧାମ ,

ପ୍ରକୃତି ସାଜିବ ଅପରୂପା ରାଣୀ

ନାଚିଯିବ ମୋର ପ୍ରିୟା ମନ ।

ବର୍ଷା ଛିଟା ଦେହରେ ବାଜିଗଲେ ଟୋପେ

ଖୋଜିବ ମୋତେ ତା'ର ପାଖେ

ଆକାଶେ ବିଜୁଳି ଘଡ଼ଘଡ଼ି ହେଲେ

ଭିଡ଼ି ନେବାକୁ ତା'ର ବକ୍ଷେ ।

ପ୍ରିୟା ଅଛି ମୋର ଅନେକ ଦୂରରେ

କାହିଁ ନାହିଁ କାହିଁ ବାଟ ,

ଆଖି ପାଏ ନାହିଁ ଦେଖିବାକୁ ତାକୁ

ପାଏନା ଛୁଇଁବା ପାଇଁ ହାତ ।

ମନେ ଥିବ ନା ଭୁଲି ଯାଇଥିବ

ପାଶେ ନାହିଁ ବୋଲି ତା'ର

ତୁ ଦେଲେ ବରଷି ଖୋଜିବ କାଳେ ସେ

ଭାବି ମୋତେ ଆପଣାର ।

ଆ ବର୍ଷା ଆ ପ୍ରିୟାକୁ ମୋର ଭିଜେଇ ଦେଇ ଯା'

ଇନ୍ଦ୍ରଧନୁ ଦେହରେ ବୁଣି

ସପ୍ତରଙ୍ଗେ ରଙ୍ଗୀ ଦିଶୁ ସେ ସୁନ୍ଦରୀ

ମୁହଁ ଟି ଦିଶୁ ଚାନ୍ଦିନୀ ।

ବରଷି ଯାଆରେ ହୋଇ ଗଦଗଦ

ଗର୍ଜି ଯାଇ କଳାମେଘ ,

ମୟୂର ସାଥିରେ ମୋ ପ୍ରିୟା ନାଚିବ 

ବଜାଇ ଢୋଲ ମୃଦଙ୍ଗ ।