ये रे घना

ये रे घना

उन्हाने रणरणत्या वणव्याने

तप्त झाली व्याकूळ धरणी

तू ये रे घना शमवण्या तृष्णा

कर रुसल्या धरणीची मनधरणी

जलाविना सृष्टी झाली किती कष्टी

बरस घना फुलवण्या हास्य तिच्या गाली

किलबिलतील पाखरे हर्षाने पुन्हा

येशील ना लवकर प्रतिक्षा खूप झाली

तुझ्या येण्याने फुलतील मळे

हिरवी किमया चौफेर पसरेल

भागेल भूक भाबड्या जित्रापांची

आगमन तुझे तहानल्या सृष्टीला हसवेल

ये रे घना तुझी आस लागली

बरस जोमाने देण्या नवचैतन्य

सुखावेल अन्नदाता सृष्टीचा बघ

तुझ्या येण्याने होईल तो धन्य