माझी माय मराठी

काय सांगू रुबाब बाई

माझ्या मायमराठीचा

प्रत्येक अक्षराने जपला

वारसा लेखनसंस्कृतीचा

साज श्रीमंतीचा मराठीला

वर्ण आहेत हिच्यात बावन्न

बावन्न वर्णात सामावले साहित्य

भाषा किती माझी आशयसंपन्न

स्वरचिन्हे हिची शोभती

अलंकारच जणू सुवर्णाचे

व्याकरण,अलंकार असती

साज सुंदर पर्वणीचे

कधी कधी होतो मात्र

शब्दांमुळे मोठा जांगडगुत्ता

एकाच अर्थाचे कित्येक शब्द

गाजवती मनामनांवर सत्ता

अपयश येता पदरी कुणाच्या

म्हणती त्याची झाली 'हार'

यश मिळता जीवनी कुणाला

त्याच्या गळ्यात बघा पडतो 'हार'

अशी ही मराठी मायमाऊली

अखंड हिच्यात

 लेखनसंपत्तीचा वारसा

सामर्थ्य इतके हिच्यात सामावे

जिंके माझी मराठी अमृतातही पैजा