साने गुरुजी

करील जो मनोरंजन मुलांचे

जडेल नाते प्रभूशी तयाचे

हेच होते सार जीवनाचे

आपल्या लाडक्या सानेगुरुजींचे

गोष्टींतून दिले संस्कारमोती

कवितांतून शिकवली देशभक्ती

गांधीजींची विचारसरणी आचरती

जगाला संदेश प्रेमाचा देती

शिकवली आईने सदभावना

नको दुखवू कुणाच्या मना

असते रे मन मुक्या कळ्यांना

नाही दिला फाटा आईच्या संस्कारांना

पांडूरंगाने विठूमाऊली मुक्त केली

दर्शनरांग सर्वांसाठीच खुली झाली

जातीभेद,अस्पृश्यता नाही भावली

मानवतावाद,समाजसुधारणा साहित्यी दिसली

'शामची आई' जगी प्रसिद्ध झाली

यशोदेने यशोदा पुन्हा जिवंत केली

जगाला संस्कारज्योत जिने दिली

सानेगुरुजींना सदभावनांची स्नेहांजली