व्यथा बळीराजाची
व्यथा बळीराजाची
देवा सांग कशापायी
घेतो माझी तू परीक्षा
सांग कोणत्या पापाची
भोगतूया मी रे शिक्षा
रानामंदी दिसरात
ढोरावानी मी राबतो
नाही सीमाच कष्टाला
तितं घाम मी गाळतो
कशी बेगमी वर्षाची
करू सांग मला आता
तुझा जगाचा पोशिंदा
असा उपाशी राहता
पावसाच्या खेळापायी
खेळ झाला रं शेताचा
त्याने पिकवले शेत
झाला काळ तो पिकाचा
पीक येता मुबलक
भाव मिळंना मालाला
डोई डोंगर कर्जाचा
घोर लागला जीवाला
ईडापिडा आता देवा
जावो आमच्या पाठची
राज्य येवो रे बळीचं
हीच आस रे मनाची