वंशज्योत...

आई ऐ आई ,ऐक ना ग म्हणणे माझे :

जन्मआधीच कसे होते तुला माझे ओझे?

आई, माझ्या येण्याने लागे लक्ष्मीची चाहूल;

जशी धरा तशी जननी बनून ठेवीन घरी पाऊल.

वंशाचा 'दिवा' म्हणून मुलगाच तुला हवा;

होऊनी "वंशज्योत" मी रचेल इतिहास नवा.

आई,मी नसता कसा पेटेल तुझा वंशाचा 'दिवा'

वात बनून घडवेल मीसुद्धा जिजाऊंचा "शिवा"

आई,मी शृंगारात यामिनी, प्रणयरसात कामिनी;

उद्याचे भविष्य उद्धारणारी मीच तर दामिनी.

आई, मी स्वरांची सरस्वती, जीवांची धरित्री;

ज्ञानाचे बाळकडू पाजणारी मीच सावित्री.

आई, घेऊन तुझा वसा, मी वाचावीन ही अवनी;

कन्या- बहीण- पत्नी- आई बनून नाती फुलवीण जीवनी.

आई, मी तुझ्या गर्भातील कळी, मला उमलू दे;

'स्त्रीभ्रूण हत्या' पाप आहे, हे जगाला कळू दे.