वीज सळसळली नाही

घालमेल बावऱ्या जिवाची 

कशी तुला गं कळली नाही 

मी धावत आलो तुझ्या दिशेने

तू माझ्याकडे का वळली नाही 

मनी भावना झाल्या अनावर 

अवतरल्या मग कागदावर

डोळेही सगळे बोलून गेले 

विरह घटिका टळली नाही 

नदीकाठची तुझी ती वचने

भेट दिलेली सुगंधी सुमने

गळून गेला कोवळा बहर तो 

प्रीत बाग फळफळली नाही 

गळून गेली जुनीच खपली 

जखम तेवढी काळाने जपली 

आज कशी माझ्या स्पर्शाने

देही वीज सळसळली नाही