विद्रोह

विद्रोह म्हणजे मनाची दाहकता

रणरणत्या उन्हाच्या झळेची भीषणता

शवागृहातील निर्लज्ज दुर्लक्षित त्याजता

खोल दरीत पडलेल्या सत्याची नग्नता

आत्मपरीक्षण करायला भाग पडणारी कविता

दरडावरून कोसळणाऱ्या पाण्याची दुग्धता

विद्रोह म्हणजे

सरणावर जळणारी चिता

निवडुंगाच्या झाडाची व्यथा

सत्तेला हादरे देणारी कथा

रक्तपिपासू गोचिडाला मुळासकट संपावणारी लता

विद्रोह म्हणजे

प्रखर सुर्यकिरणांनी पेटवलेली दहशत

धोंढ्यारुपी डोंगराला जागृत करण्याची मशागत

मधमाश्याच्या पोळ्यात घातलेला हात

विसरलेल्या माणुसकीला विद्रोहाची साथ

विद्रोह म्हणजे

अंतरंगात डोकावून पाहण्याचे सामर्थ्य

हरवलेल्या शब्दांना जिवंत असण्याचा अर्थ

भोगलेल्या दारुण व्यवस्थेची विषमता

भेदरातल्या जीवांची दमलेली आक्रोशता

विद्रोह म्हणजे

झंझावाती वादळ

बंडखोरीचा जाळ

संघर्षाची जिवंत नाळ

परखड भाष्याची माळ

विद्रोह म्हणजे

तडफदार मनाची चळवळ

न्याय मिळवून देण्याची तळमळ

खवळलेल्या समुद्राची गरळ

सोसलेल्या नरक यातनांची जळफळ

विद्रोह म्हणजे

कवींच्या हिमतींचे भांडवल

असंतोष्याच्या आखाड्यात माजलेली दंगल

अन्याय अहंकाराचा काढलेला संदल

शोषितांच्या भावविश्वाततली विद्रोही जंगल

विद्रोहाची व्याख्या

जो तो करतो आपल्या परीने

वाक्यातील अर्थ लावतो आपल्या सवडीने

समाजात बदल घडवितो विद्रोह

जिवंतपणाचं लक्षण असतो विद्रोह

वर्चस्वाच्या गालावरची चपराक विद्रोह

बुरसटलेल्या व्यवस्थेेचा गळफास विद्रोह

हक्कासाठी भांडणारे विद्रोही

जगतात खऱ्या अर्थाने

विद्रोहाचा तमगा लावतात गर्वाने

जळजळीत आग ओकतोे विद्रोह

जागृत ज्वालामुखी असतो विद्रोह